سەرۆكێ ئێكەتیا كیك بۆكسینگا عەرەبی: پارێزگەها دهۆكێ هەردەم پشتەڤانا مەیە
ئەڤرۆ
د دیدارەكێ دا د. باسل ئەلشاعری سەرۆكێ ئێكەتیا كیك بۆكسینگا عەرەبی یێ رەكەز ئۆردنی كەیفخوەشیا خوە دیاركر ب رێكخستنا سەركەفتی یا قارەمانیا ئیراقێ ل سەر ئاستێ یاریزانێن سۆپەر و پارێزگەها دهۆكێ ب ئێك ژ بەربژارانە بۆ قارەمانی یان چالاكیەكا ئێكەتیا عەرەبی.
زێدەتر بۆ رۆژناما ئەڤرۆ گۆت: كەیفخوەشم وەكو مێڤانێ قارەمانیا سۆپەرا ئیراقێ دوبارە بوویمە مێڤانێ پارێزگەها دهۆكێ یا جوان و خەلكەكێ جوامێر و مروڤ دوست، جارا ئێكێ دەمێ ئەڤێ باژێرێ جوان مێڤانداریا قارەمانیا عەرەبی ل سەر ئاستێ لاوان كربوو، دەستپێكێ نەرازیبوون ژلایێ هندەك هەلبژارتیان هەبوو كو ئەوان چو پێزانین ل سەر رەوشا پارێزگەها دهۆكێ نەبوون، لێ پشتی ئێكەتیا ئیراقێ و یا پارێزگەهێ و ئەو بەرپرسێن وەرزشی ل هەرێما كوردستانێ گەشبینی بۆ مە پەیداكری، راستی ژی مە پێشبینیا وێ چەندێ نە دكر كو دێ ئێك ژ سەركەفتی ترین قارەمانیێن مە یێن سەر ئاستێ عەرەبی بیت ژبەر هەبوونا خالێن سەركەفتنێ ژ هۆل، ئۆتێل، ئارامی و سەقایێ هەرێما كوردستانێ ب گشتی و پارێزگەها دهۆكێ و ژ هەموویا گرنگترن ئەو رەوشەنبیریا مەزن یا وەرزشی و دوستایەتی یا گەلكێ كورد، لەوما دێ بێژم پارێزگەها دهۆكێ و كوردستان ئێك ژ بەربژارانە بۆ دۆبارە قارەمانیەكا خوە لێ مێڤان بكەین و هەردەم پشتەڤانا مە یە بۆ هەر چالاكیەكێ ئەم سۆپاسیا حوكمەتا هەرێما كوردستانێ و پارێزگەها دهۆكێ دكەین.
