ئەنتەر و مانچستەر ستی دێ دیرۆكا سەركەفتنان ڤەگەڕینن
ئەڤرۆ
بڕیارە ئەڤرۆ ژی ل دەمژمێر 11ێ شەڤ دو یاریێن دی یێن قۆناغا 16ێ ژ چارچووڤێ قارەمانیا یانەیێن ئۆرۆپا قارەمانێن خولا چامپیۆنز لیگ یا گەڕا ئێكێ و چوونێ بهێنە كرن، ئەنتەر و مان سیتی بەرانبەر بۆرۆسیا دۆرتمۆند و لایبزیك بن.
ئەنتەر میلان- پۆرتۆ
یاریگەها جۆزێپی میاتێزا یا بناڤودەنگ سان سیرۆ دێ مێڤانداریا ئێك ژ هێزترین یاریێن ڤێ قۆناغێ دناڤبەرا خودانێن ئەردی ئەنتەر میلان یا ئیتالی و مێڤانا وێ پۆرتۆ یا پۆرتۆگالی كەت ژبۆ گەشكرنا هیڤیێن دەربازبوونێ بۆ قۆناغا هەشتێ، یاریا ئەڤ شەڤە دێ یا هەستیار بیت بۆ ئەنتەر ئەوا دێ بزاڤێ كەت ل بن گڤاشتنا جەماوەری و سەر ئەردێ یاریگەها خوە سەركەفتنێ تۆماربكەت و بمینتە د هەڤڕكیان دا بەری دیدارا دویێ ل پۆرتۆگالێ، هەرچەندە دیدارێن بەری نوكە ئەنتەرێ دو سەركەفتن بەرانبەر خوسارەتیەكێ و وەكهەڤیەك دگەل مێڤانا خوە تۆماركرینە لێ یاریا ئەڤ شەڤە ئەڤ ئامارە نابنە پیڤەر بۆ ئەنجامەكێ دلخوەشكەر، دیسان یانەیا پۆرتۆ دگەل یانەیێن ئیتالی حەفت جاران بەرانبەر بوویە و بتنێ ئێك خوسارەتی، چار سەركەفتن و دو وەكهەڤی هەبووینە، سێرجیۆ كۆنسێساو راهێنەرێ پۆرتۆ دێ خوە سپێرتێ ل سەر ستێرێن تیمێ مەهدی ئەلتارمی گۆلكەرێ چامپیۆنزێ ب پێنچ گۆلان، ویندرسۆن، ئێدۆاردۆ گابریێل و تۆنی مارتێنێز، لێ یانەیا ئەنتەر باش دزانیت خوسارەتی دیاریا ئەڤ شەڤە دا ئانكۆ لاوازبوونا هیڤییان سەرباری شەڕێ وێ ل خولا ئیتالیا ژی دایە ئەوا نوكە ب 47خالان رێزا دویێ دهێت، لێ چامپیۆنز دبیت بۆ وێ باشتر بیت ژبەركو هەڤڕكا وێ ناپۆلی 15 خالان ژێ دووركەفتیە، سیمیۆنی ئینزاگی راهێنەرێ ئەنتەر دێ ب هەموو چەكێ خوە هێتە دناڤ یاریێ دا ب سەركێشیا لاوتارۆ مارتینێز و رۆمێلۆ لۆكاكۆ، هێنریك مخێتریان، ماتیۆ دارمیان.
لایبزیك- مانچستەر ستی
د یاریا دویێ یا هەڤڕكیێن ئەڤ شەڤە دا بڕیارە یانەیا لایبزیك یا ئەلمانی ل یاریگەها خوە رێدبۆل ئارینا مێڤانداریا ئێك ژ بەربژارێن ناسناڤێ چامپیۆنزێ یانەیا مانچستەر ستی یا ئنگلتەرایێ بكەت كو دهێتە چاڤەڕێ كرن ببیتە یاریەكا بهێز، دبیت هندەك ژ پشتەڤان و چاڤدێرێن وەرزشی هوسا هزركربیت دیدارا ئەڤ شەڤە بۆ تیما ئنگلتەرایێ ب سانەهی بیت ژبەر جوداهیا دناڤبەرا هەردو یانەیان ژ ئاست و ئەنجامێن وێ د خولێن وەلاتێن واندا و دیسان فاكتەرێ شارەزاهیا مان ستی د چامپیۆنزێ دا باشتر بیت ژ لایبزیكێ، لێ تیما مێڤاندار دناڤ یاریگەها خوە دایە و شیابوو ل وەرزێ بۆری ژ قۆناغا كۆمان یێ قارەمانیێ دناڤ ئەردێ خوە دا ب دۆ گۆلان بەرامبەر گۆلەكێ سەركەفتنێ ل سەر مان ستی بینت، لێ د یاریا دویێ دا یانەیا ئنگلتەرایێ بەرسڤەكا تۆند ب ئەنجامەكێ مەزن سەركەفتن ئینابوو ب شەش گۆلان بەرانبەر سێ گۆلان، دبیت پێكهاتیێ مان ستی بهێزتربیت و شیانێن سەركەفتنێ نێزكتربن ژبەر هەبوونا هێرشبەرێ وێ ستێرێ نەرویجی ئیرلینگ هالاند، فێل فۆدین، كێڤێن دی برۆیین، ریاز محرێز، ئیلكایی گۆندۆكان، جاك گرالیچ، جۆلیان ئالڤارێز كو كۆمەكا باش و شارەزا هەنە، لێ یانەیا ئەلمانی هوسا خوە ب سانەهی ژ دەست بەرنادەت و بزاڤێن وێ سەركەفتنەكا باش بیت دناڤ یاریگەها خوە دا بەری دیدارا دویێ و راهێنەر ماركۆ رۆزە دێ پشتگەرمیێ ل سەر دۆمێنیك سۆبۆسزلایی، ئێمێل فۆرسبێرگ، كۆنراد لایمەر و تیمۆ فێرنەر كەت.
