شەریف ئیبراهیم: یانەیا شێلادزێ پێدڤی ب پشتەڤانیێ یە
ئەڤرۆ
نەوزاد هلۆری:
بو سالا دویێ ل دووڤ ئێك تیما تەپا پێی یا یانەیا شێلادزێ بەرهەڤیان بۆ وەرزێ نوو یێ خولا پلا دویێ یا كوردستانێ دكەت ب هیڤیێن دەستڤەئینانا پلێتا دەربازبوونێ و یانە پێدڤی ب پشتەڤانیێ یە.
شەریف ئیبراهیم سەرۆكێ یانەیا شێلادزێ بۆ رۆژناما ئەڤرۆ گۆت: ئارمانجا سەرەكی یا مە خزمەتكرنا خەلكێ دەڤەرێ و پێگەهاندنا وەرزشڤانایە تایبەتی د یاریا تەپا پێی دا، د نوكە دا هەموو یارێزانێن مە ژبلی گولپارێزی خەلكێ دەڤەرێ نە و ئاستێ وان تا رادەیەكێ باشە و ئامادەینە كو ئەڤ سالە ژی پشكداریێ د خولا پلە دویێ دا بكەین، ئەم بزاڤێ دكەین دو یاریزانان ل دەرڤەیێ دەڤەرێ بینین داكو شێوازێ وان یێ یاریێ بهێتە گوهۆڕین و بەرچاڤ رونی پتر بۆ دروست بیت.
زێدەتر ناڤهاتی گۆت: جهێ داخێ یە پشتەڤانیا دارایی بۆ یانەیا شێلادزێ نینە، ژبلی ڤێ یەكێ مە چو یاریگەه ژی نینە، لەوما د نوكە دا دەستەیا كارگێری یا یانەیێ و یارێزان هەموو خوەبەخشن، مە یاریزان هەنە فەرمانبەرن و یێ هەیی دوكاندارە و كرێكارە پشتی كارێن خوە دهێنە راهێنانان، ئەڤێ یەكێ ئاستەنگ بەرانبەری یانێ دروستكرینە، لەوما دخوازین كو ئالیێن شولەژێ و حوكمەت و ئێكەتیا تەپا پێی ژی پتر پشتەڤانیا یانەیێن بچووك بكەن داكو ئەو ژی بشێن كار بكەن و بهێنە پێش.
