گەنجێ نوكە دێ چاوا بیتە خودان كار و داهات ؟
ئەڤرۆ
دهۆك، نەوزاد هلۆری:
خەلات ئەمین، كچەكا گەنج یا دەڤەرا ئامێدیێ یە دیار كر، د ڤی دەمی دا پەیدابوونا كاری كارەكێ هەرە ب زەحمەتە ب تایبەتی بۆ رەگەزێ مێ و گۆت: (ژیان هوسایە و دڤێت ب هەر رێیەكا هەبیت مرۆڤ بزاڤان بكەت ببیتە خودان كار و داهاتەكێ تایبەت ب خوڤە هەبیت، دا كو بشێت گەرەنتیا ژیان و پاشەرۆژا خوە بكەت، جهێ داخێ یە ل ڤان چەند سالێن دووماهیێ ئاستەنگێن هەرە مەزن ل هەمبەری تاكێن جڤاكی ب گشتی و گەنجان ب تایبەتی دروست بووینە، بۆ هندێ بشێن ببنە خودان كار و داهات، نوكە ئەڤە دوو سالە من خواندنا خوە ب داوی ئینایی و ل كاری دگەریێم، بەلێ هەتا نوكە نینن، ب تایبەتی بۆ دەرڤەیێ باژێری و گوند و كۆمەلگەهان، ب چو رەنگان كار ب دەست ناكەڤیت).
بژار نێروەیی، ئەو ژی كورەكێ دهۆكێ یە و ل پێش ژ پێشانگەهێن دەلیڤێن ل كاری دگەریا بۆ ئەڤرۆ گۆت: (ئەڤە دوو سالە ئەز ژی ل كاری دگەریێم و هەتا نوكە دەست من نەكەفتیە، ب دیتنا من دڤێت وەزارەتا كاروبارێن كومەلایەتی ئەركێ سەرپەرشتیكرنا پێشانگەهێن دەلڤێن كاری ژلایەكێ ڤە، كەرتێ تایبەتی ژ لایەكێ دنڤە روولێ خوە ببینن بۆ پەیداكرنا دەلڤێن كاری بۆ گەنجان ب شێوەییەكێ یەكسان ب گۆرەی هندەك مەرج و رێنمایێن دیاركری، نەك هەر كەس و لایەن ب كەیفا خوە هندەك مەرج و رێنمایان بدانیت و خودان كاری چەوا ڤیا وەسا رەفتارێ بكەت، گرنگە د وەلاتێ مە دا گرنگی ب رۆلێ گەنجان بۆ پێدانا كاری بهێتەدان، دا كو ئەو ژی بشێت كار و خزمەتێ بۆ وەلاتێ خوە بكەت، ئەڤجا ئەو كارە چ ل كەرتێ گشتی بیت یان كەرتێ تایبەت، جهێ داخێ یە چو مەرج و گەرەنتی نینن گەنجێ مە ل كوردستانێ بیتە خودان كار و پیشەیێ تایبەت بخوڤە و بژیت).
موسا زاخۆ، ئەو ژی گەنجەكێ دەڤەرا زاخویە ل سەر بابەتی گۆت: (پێنگاڤا ئێكێ یا نوكە كار بۆ گەنجان بهێتەدان، دڤێت كەرتێ تایبەتی بهێتە كاراكرن، ئەو ژی ل گۆرەی قانوونەكا تایبەت كو تێدا 80% دەلیڤێن كاری یێن كەرتێ تابەت بدەن، خەلكێ مە ب تایبەتی گەنجان، دیسان كەرتێ گشتی ژی كار بۆ چێكرنا كەسانێن كاركەر دروست بكەت وەكو خانەنشینكرنا كەسانێن مەزن و دامەزراندنا گەنجان ل شوونا وان، دیسان جهەتێن گرێدای گەنجان راهێنن دا كو ببن خودان كار، نوكە خەلكی ترس ل كەرتێ تایبەت هەیە و پتر بەرێ خوە دایە كەرتێ گشتی بۆ كاركرنێ و پەیدابوونا دەلیڤێن كاری، نوكە مەرج و رێنمایێن كەرتێ تایبەت پتر ل سەر بنەمایێ پەیوەندیان دهێت و مرۆڤكانێ زۆر رۆل هەیە، كۆمپانیێن مەزن زۆر ب كێمی پشكداری پێشانگەهێن دەلیڤێن كاری دبن ب بهانەیا هندێ ل نافخوە بسپور و تایبەتمەند كێمە و پتر پشتبەستنێ ب جیهانا دەرڤە دكەن).
زەینەب سالح، ئەو ژی كچەكا دهۆكێ یە وەكو كومپانیا ئالكو پشكداری د پێشانگەهەكا دەلیڤێن كاری دا كربوو، بۆ ئەڤرۆ گۆت: (وەكو كومپانی دێ نێزیكێ 30 دەلیڤێن كاری بۆ گەنجان بەردەست كەین بۆ هندێ ئەو ژی بشێن ببنە خودانكار، بەلێ د راستی ژی دا ئەم ل گۆرەی هندەك مەرج و رێنمایێن تایبەت دێ ب رێیا سی ڤی وەرگرین، ناڤەشێرم هەموو سیڤی ناهێنە وەرگرتن، باشترین شێواز بۆ وەرگرتنا گەنجان د نوكە دا ئەوە شیانێن هەری باش ل دەڤ هەبن و بشێت كار بكەت و سەرەدانا جهێ كاری بكەت دا كو بهێتە وەرگرتن).
ئەڤین عەبدولقادر، نوونەرا پەیمانگەها ئارارات ل دهۆكێ گۆت: (كار و پێشە ئێك ژ وان ئارمانجێن هەموو گەنجانن، دەستكەفتنا وان ژی ب زەحمەتە دڤی دەمی دا، وەكو پەیمانگەها ئارارات ب رێیا سیڤی سالانە چەندین كەسان وەكو ماموستا و فەرمانبەر وەردگرین بۆ هندێ بارێ سەر كەرتێ گشتی بهێتە سڤكرن و رەوشا گەنجان ژی باشتر بیت ژ رۆیێ دارایی، بەلێ پرانیا كارێن مە دبیت دەمكی بن).
ئەیمەن سەگڤان، نونەرێ پەیمانگەها دێربی ل دهۆكێ، بۆ ئەڤرۆ گۆت: (ئەم ناڤەندەكا زانستینە ل كوردستانێ، هەر سال مە پێدڤی ب كەسانێن بسپور و تایبەتمەند هەیە بۆ هندێ بشێن خزمەتا وەلاتێ خوە بكەین، بێگومان پیڤەرێ سەرەكی یێ وەرگرتنا هەر كەسێ ژلایی َمە ئەوە خودان باوەرنامەكا زانستی بیت، خودان شیان و ئەزموون بیت، بشێت كار بكەت و بەهەمهێنەر بیت، لەوا كەسانێن ئەڤ مەرجە پتر ل دەڤ هەبن بێگومان دێ دەیڤە پتر بۆ وان بیت).
دلخواز لاوان، ئێك ژ رێكخەرێن پێشانگەها دەلیڤێن كاری یا سەر ب مالا لاوان ل دهۆكێ بۆ ئەڤرۆ گۆت: (وەكو مالا لاوان د چارچوڤێ كوربەندێ دوویێ یێ مالا لاوان دا، مە ب فەر دیت پێشانگەهەكا دەلیڤێن كاری دانین و پتری 30 كۆمپانی پشكداربووینە و هەر ئێك ژ وان هژمارەكا دەلیڤێن كاری بۆ گەنجان بەردەستكرینە بۆ هندێ ئەو ژی ببنە خودان كار و داهات).
