بازرگانی ب مالبچووکێ ژنێ دهێتە كرن
ئەڤرۆ
هەولێر، قائید میرۆ :
بسپۆرەكا ڤەكۆلینێن تاوانان ئاشكرا كر، بازرگانی كرن ب مرۆڤان ل سەرانسەری جیهانێ د زێدەبوونێ دایە و ل گەل پێشكەفتنا جیهانێ و گۆهۆڕینا ژیانێ بازرگانی ب مرۆڤان ژی هاتیە گۆهۆڕین و گوت: هەتا وی رادەی بازرگانی ب مرۆڤان گەهشتیە ئاستەكی رەحمێ ژنێ ب كرێ دهێتە گرتن هەتا زارۆك پەیدا دبیت، ئەڤجاپێدڤیە هشیاری دناڤا جڤاكی دا هەبیت بۆ نەهێلان و كێمكرنا بازرگانیێ ب مرۆڤان ب تایبەت ژنان.
پروشە قەلەندەر، بسپۆر د بیاڤێ ڤەكۆلینێن تاوانان دا بۆ رۆژناما ئەڤرۆ دیار كر، هەر د كەڤندا بازرگانی كرن ب مرۆڤان هەبوویە، بەلێ سەردەمێ بەرێ بازرگانی كرن ب مرۆڤان ل گەل سەردەمێ نوكە جوداهی هەیە و گۆهۆڕین ل سەر بازرگانیا ب مرۆڤان هاتینە، چونكە پێشكەفتنا تەكنولۆژیایێ و گەشەكرنا ژیانێ بوویە ئەگەر گۆهۆڕین ل سەر بازرگانیا ب مرۆڤان پەیدا ببن.
پروشێ د بەردەوامیا ئاخفتنا خوەدا گۆت: (كۆیەلایەتیا سەردەم هەیە و كڕین و فرۆتن ب مرۆڤان دهێتە كرن ب شێوەیەكێ سەردەمیانە بۆ نموونە بازرگانیا سێكسی ئەف جورێ بازرگانیێ ب مرۆڤان ب مەرەما تێركرنا حەزێن سكسی پارە دهێتە بكار ئینان و ژێدەرێ ماددی دەست دكەڤیت و هندەك جاران ژی قوربانی دهێنە بكارئینان و سەردابرن و جاران ژنێ بو لەشفروشیێ بكاردئینن).
ئەڤێ بسپۆرا ڤەكۆلینێن تاوانان گۆتژی: (بازرگانیا ب مرۆڤان گەهشتیە ئاستەكی جەستەیێ ئافرەتێ ب مەرەما دو گیان بوونێ ل جهێ كەسەكێ دی دهێتە بكارئینان بۆ نموونە رەحمێ ئافرەتێ ب كرێ دهێتە گرتن هەتا زارۆك پەیدا دبیت و دووڤدا دێ زارۆكی دەتە ئەوی كەسێ بازرگانیێ دكەت، حالەتێن بڤی شێوەی ل وەلاتێن هەژار هەنە).
