ئەڤە 10 سالن چو ژن ل چۆمان نەهاتینە كوشتن
ئەڤرۆ
هەولێر، قائید میرۆ:
موقەدم فەرمان مستەفا، رێڤەبەرێ نڤیسینگەها بەرهنگاربوونا توندوتیژیێ دژی ژنان ل چۆمان بۆ رۆژناما ئەڤرۆ دیار كر ل سالا 2013ێ نڤیسینگەها بەرهنگاربوونا توندوتیژیێ ب فەرمانا وەزارەتا ناڤخۆ ل سنورێ قەزا چۆمان هاتیە ڤەكرن و لژێر فەرمان و رێنمایێن وەزارەتێ كار دكەت و گۆت: (مەرەم ژ ڤەكرنا رێڤەبەری و نڤیسینگەهێن بەرهنگاربوونا توندوتیژیێ بۆ هشیاركرنا خەلكی و دووڤچوون و وەرگرتنا سكالایانە لدۆر بابەتێن توندوتیژیێ).
موقەدم فەرمان مستەفا ئاماژە پێ كر كو ل سالا بۆری سەر ئاستێ هەرێما كوردستانێ كێمترین رێژا توندوتیژیێ هاتیە تۆماركرن، ژبەرهندێ ئەڤ سالە حوكمەتا هەرێما كوردستانێ هەوا 16 رۆژیا بەرهنگاربوونا توندوتیژیا دژی ژنان ل چۆمان هاتە دەستپێكر.
رێڤەبەرێ نڤیسینگەها بەرهنگاربوونا توندوتیژیا دژی ژنان د بەردەوامیا ئاخفتنێن خوەدا گۆت: (ئەڤە 10 سالە چو ژن ل سنورێ رێڤەبەریا مە نەهاتینە كوشتن، ئانكو ژن كوشتن ل دەڤەرێ نینە، بتنێ هندەك حالەتێن سوتنێ هەبووینە و ئەو ئاریشێن هاتینە تۆمار كرن ژی ئاریشێن زۆر مەزن نەبووینە).
موقەدمی گۆتژی: (ل نڤیسینگەهێن مە ژۆرەكا قانوونی و خزمەتگوزاریێن دەروونی هەیە و هەتا نوكە شیاینە زۆربەیا ئاریشان چارەسەر بكەن بەری بچنە دادگەهێ).
موقەدم فەرمان مستەفا ئەو چەندە ژی ئاشكرا كر كو، ل سالا بۆری گورەی ئامارێن بەردەست ل سنورێ قەزا چۆمان بتنێ 15 هەتا 18 بادەكێن توندوتیژیێ هاتینە تۆمار كرن ئەڤە ژی بۆ ئەگەر ل سەر ئاستێ هەموو رێڤەبەرای و نڤیسینگەهێن بەرهنگاربوونا توندوتیژیێ دەڤەرا چۆمان ببیتە پاقژترین دەڤەر بۆ كێمبوونا توندوتیژیێ و گۆت: (هەروەسا ژلایێ فڕاكسیۆنا پارتی ل پەرلەمانێ كوردستانێ رێز و سوپاسنامە پێشكێشی نڤیسینگەها مە هاتیە كرن ل هەمبەر ماندیبوون و خزمەتا كارمەندێن نڤیسینگەها چۆمان د ئەركێ خوەدا).
رێڤەبەرێ نڤیسینگەها بەرهنگاربوونا توندوتیژیا دژی ژنان دیار ژی كر كو خەلكێ سنورێ چۆمان یێ هەڤ سنورە ل گەل كۆمارا ئیسلامیا ئیرانێ، بەلێ هەتا نوكە كەلتوورێ ئیرانێ كاریگەری ل سەر جڤاكێ چۆمان نەكریە، ئەو تشتێن بەری نوكە دهاتنە گوتن كو جڤاكێ مە یێ باب سالاریە و ل سەر بچووكەترین ئاریشە ژن دهێتە كوشتن ئەڤە نەمایە و گۆت: (تەكنولۆژیا سەردەم كاریگەریێن خوە ل سەر هشیاریا وەلاتیان هەبوویە، ژن هەتا رادەكێ زۆر هشیارن هەمبەر مافێن خوە، هەكە هندەك جاران ژی ئاریشە هەبن دناڤا خێزانێ دا هەر دناڤا خێزانێ بخۆدا ئاریشە دهێنە چارەسەر كرن).
موقەدمی گۆتژی: (ژنێن دەڤەرا مە ب ئاوایەكێ تەندروست سەرەدەریێ ل گەل سۆشیال میدیایێ و تۆرێن جڤاكی دكەن، هەروەسا مامۆستایێن ئایینی و خەلكی ژێهاتی یێ دەڤەرێ رۆلەكێ مەزن هەیە د هشیاركرنا جڤاكی دا و بەردەوام مامۆستایێن ئایینی ب رێیا گۆتارێن خوە یێن رۆژا ئەینی هانا وەلاتیان ددەن بۆ دانا مافێن ژنان و دوور بكەڤن ژ هندەك رەوشت و تیتالێن بەرۆڤاژی شەریعەتێ ئیسلامێ و جڤاكێ كوردی.
