د خولا كوردستانێ دا دهۆك و زاخۆ دێ بزاڤێن خوە قورتالكرنێ كەن
قەیس وەیس:
دهێتە چاڤەڕێ كرن ئەڤرۆ ل دەمژمێر سێ پشتی نیڤرۆ حەفت یاری ژ چارچووڤێ هەڤڕكیێن گەڕا 20 یا خولا كوردستانێ بۆ یانەیێن پلا نایابا تەپا پێی ل چەند یاریگەهێن باژێرێن هەرێمێ بهێنە ئەنجامدان، دڤێ گەڕێ دا هەرسێ یانەیێن پارێزگەها دهۆك و ئیدارا سەربەخوەیا زاخۆ دێ مێڤاندارییا نوونەرێن هەولێرا پایتەخت و سلێمانیێ كەن.
– دهۆك و زاخۆ ل بن گەڤێن داكەفتنێ دانە
ل یاریگەها خوە یا سێیێ تیما یانەیا دهۆك دێ مێڤانداریا یانەیا دەربەندیخان ب هیڤی و ئارمانجێن دەستڤە ئینانا سێ خالان پێخەمەت بزاڤێن خوە قۆرتالكرنێ و چو رێكێن دی نینن ژبلی سەركەفتنێ هەكە بڤێت هیڤیێن خوە بۆ مانا د خولێ دا بهێلیت ژبەركو تیما دهۆكێ ل رێزا دووماهیێ دهێت بتنێ 14 خال كۆمكرینە 11 خوسارەتی، دو وەكهەڤی و چار سەركەفتن، ئانكو خرابترین ئەنجام و رێزبەندی دایە، تیما مێڤان 25 خال كۆمكرینە و رێزا پێنجێ دهێت.
ژلایێ خوەڤە یانەیا زاخۆ نوونەرا سەربەخوەیا زاخۆ ژی د كاودانەكێ باش دا نینە ئەوا 19 خال كۆمكرین و رێزا13ێ و بەری دووماهیێ دهێت، ژ چار سەركەفتن، حەفت وەكهەڤی و حەفت خوسارەتی، كوڕێن خابووری ژی دێ ل بن گڤاشتنێن جەماوەرێ خوە بزاڤێن سەركەفتنێ كەن ژبۆ گەشكرنا هیڤیێن مانێ د خولێ دا و ژبلی سەركەفتنێ چو بژاردەیێن دی نینن، لێ مێڤانا زاخۆ یانەیا شەقلاوە ئێك ژ تیمێن هەڤڕكە د خولێ دا ئەوا 25 خال كۆمكرین و رێزا چارێ دهێت، ئانكو یاریەكا ب سانەهی نابیت، ل دووڤ ژێدەرێن نێزیك ژ هەردو یانەیان كو راهێنەرێن وان دێ سپارتا خوە ل سەر كۆمەكا یاریزانێن پیشەكار و یێن پشكدار دگەل تیمێن خوە یێن خولا ئیراقێ دا ژبۆ مفا وەرگرتنێ.
ژلایەكێ دووڤە یانەیا ئاكرێ دێ بزاڤێ كەت بەردەوامیێ بدەتە پێشڤەچوونا خوە بۆ رێزێن پێشیێ دەمێ ل یاریگەها خوە مێڤانداریا یانەیا چوارقۆرنە بكەت، ئاكرێ ب 24 خالان رێزا نەهێ دهێت و چوارقۆرنە 23خالان هەنە و رێزا 11ێ دهێت، یاری ب سانەهی نابیت بۆ نوونەرا پارێزگەهێ ژبەركو تیما مێڤان ژی ب هیڤییە بۆ ئەنجامەكێ باش.
ژ یاریێن دی یێن ئەڤرۆ: سیروان نوو- سەید سادق، برایەتی- چەمچەمال، شێروانە- پێشمەرگەیا هەولێر و سۆران – ئارارات، هندرین دڤێ گەڕێ دا یا چاڤەڕێ بیت.
