باسكێت بۆلا زاخۆ د قۆناغەكا نازک دا یە بۆ چارگۆشەیا زێرین
ئەڤرۆ
دهێتە چاڤەڕێ كرن ئەڤرۆ ل دەمژمێر چارێ ئێڤاری تیما باسكێت بۆلا یانەیا زاخۆ دێ ئێك ژ پێنچ یاریێن خولێ و چارەنڤیس ژ چارچووڤێ هەڤڕكیێن پلا نایابا ئیراقێ ئەنجامبدەت ژبۆ گەشتكرنا هیڤیێن خوە یێن دەربازبوون بۆ قۆناغا چارگۆشەیا زێرین، ئەوا دێ ل هۆلا گرتیا بنگەهێ لاوان مێڤانداریا یانەیا حەشد ئەلشەعبی دكەت.
هیڤیێن زاخۆ سەركەفتنە
تیما یانەیا زاخۆ هیڤیێن دەربازبوونێ د دەستی دا ماینە ئەوا نوكە 31 خال كۆمكرین ژ 13 سەركەفتن و پێنچ خوسارەتیان ل رێزا پێنجێ دهێت، پێدڤی یە ل سەر كوڕێن خابووری د یاریا ئەڤرۆ و یێن داهاتی دا سەركەفتنان بینت و مفایی ژ خالێن تیما خوە یا لاوان وەربگریت ژبۆ مسۆگەركرنا چارگۆشەیا زێرین ئەوا بتنێ ئێك پلێت ل بەردەست مایە پشتی هەرسێ یانەیێن نەفت، شورتە و حەشد شەعبی سێ پلێتێن دی مسۆگەر كرین، لێ ئەركێ یانەیا زاخۆ ب سانەهی نینە بۆ دەستڤە ئینانا پلێتا دەربازبوونێ ژبەركو دو یانەیێن دی ژی هەڤڕكیێ بۆ ئەوێ پلێتێ دكەن، سەرباری زاخۆ شیایە سەركەفتن ل سەر ئەوان بینت ئەوژی دیفاع ئەلجەوی و دیجلە ئەلجامعە ئەوێن رێزێن چارێ و شەشێ دهێن.
راهێنەر پشتا خوە ب جەماوەری گەرم دکەت جوتیار عەلی هاریكارێ راهێنەرێ زاخۆ داخواز ژ جەماوەری كریە ب زوورترین رێژە ل یاریگەهێ ئامادەبن ژبۆ پشتەڤانیا تیمێ و گۆت: یاریا ئەڤرۆ دگەل حەشد ئێك ژ بهێزترین یاریێن مەنە و چارەنڤیسە بۆ پلێتا دەربازبوونێ، هەر یاریەكا ژ ئەوان پێنچ یاریێن ماین بوو مە یا دووماهیێ یە دڤێت سەركەفتنێ بینن بێ چاڤەڕێ چو ئەنجامێن دی بكەین، ژ پێنچ یاریێن ماین یێن خولێ چار یاری دناڤ ئەردێ مە دانە و دەلیڤەكا زێرین دەستێ مەدایە ژبۆ سەركەفتنێ و دەربازبوو بەر ب قۆناغا چارگۆشەیا زێرین كو دێ دیرۆكەكا نوو بیت، ب هیڤینە جەماوەرەكێ مەزن بەرهەڤبیت بۆ پشتەڤانیێ و مە باوەری هەیە دێ ئامادەبن چنكو جەماوەرێ مە دلسۆزێ ناڤێ زاخۆ نە.
