دەستەكا نوو یا یانەیا باتیفا هاتە هەلبژارتن
ئەڤرۆ
ل پێنچ شەمبیا بۆری رێورەسمێن هەلبژارتنێن دەستەكا نوو یا كارگێریا یانەیا باتیفا یا وەرزشی هاتە ئەنجامدان ئەوا ب سەرپەرشتیا رێڤەبەریا وەرزشی ل دهۆكێ و بەرهەڤبوونا 122 كەسان كو 119 ژ دەستەكا گشتی یا یانەیێ مافێ دەنگدانێ هەبوون و 11 كەسان خوە بەربژاركربوو، پشتی پرۆسێسا دەنگدانێ هاتینە كرن هەشت كەس هاتنە هەلبژارتن ل سەر ئەنجامێن دەنگدانێ و دووڤدا پۆست ژی بشێوەیێ دەنگان هاتنە بەلاڤكرن و بڤی رەنگی خوارێ:-
ئەیهەم جامی ب كۆمكرنا 110 دەنگان وەكو سەرۆكێ یانەیێ هاتە هەلبژارتن، سەردار محەمەد ب كۆمكرنا 100 دەنگان ئەمیندارێ دارایی، ئادم بەدەل 85 دەنگ جێگرێ سەرۆكی، نیهاد ئەبابەكر 69 دەنگ وەكو سكرتێرێ یانێ، هەر ئێك ژ كۆڤان سلێمان 84 دەنگ، عەبدوللا یوسف 76 دەنگ، جەهوەر خەلیل 68 دەنگ و هەڤال لوقمان 63 دەنگ كۆمكرن بوونە ئەندامێن كارگێریێ.
ل دۆر ڤێ یەكێ سەفەر جەعفەر رێڤەبەرێ وەرزشی ل دهۆكێ بۆ رۆژناما ئەڤرۆ گۆت: پشتی بڕیار هاتیە دان كو هەلبژارتنێن پێنچ یانەیێن مایی ژ پارێزگەها دهۆكێ و ئێدارا سەربەخوەیا زاخۆ بهێنە ئەنجامدان ئەو یانەیێن نوو هاتینە دامەزراندن، لیستەك بۆ یانەیان هاتینە دانان د ماوێ ڤێ حەفتیێ دا هەلبژارتی بهێنەكرن ل دووڤ رێنما و یاسایا ئیراقێ یا سالا 1986ێ، یانەیا باتیفا ئێكەم یانە بوو كو بشێوەكێ رێكخستی و دروست دەست ب هەلبژارتنان كرن، سۆپاسیا لایەنێن پەیوەنیدار تایبەت دەڤەردار و هێزێن ئەمنی دكەین و پیرۆزباهیا دەستەكا نوو دكەین، گەشبینن د ڤێ حەفتیێ دا ئەو یانەیێن مایی ب هەمان شێوەیێ رێكخستی و سەركەفتیانە هەلبژارتنێن خوە ئەنجامدەن.
بۆ زانین ل دووڤ لیستا هەلبژارتنان بۆ یانەیێن مایی، سوبەهی یانەیا دینارتە، سێ شەمبیێ یانەیا شێلادزێ، پێنچ شەمبیێ هەردو یانەیێن پیرس و باتیفا دێ هەلبژارتنیێن خوە ئەنجامدەن.
