سێمێل پێدڤی ب سێ خالانە بۆ پاراستنا مانا خوە
ئەڤرۆ
بڕیارە ئەڤرۆ حەفت یاریێن گەڕا 16ێ ژ هەڤڕكیێن خولا پلا ئێكا كوردستانێ ل یاریگەهێن جودا یێن هەرێمێ بهێنە كرن، تیما تەپا پێی یا یانەیا سێمێل دێ دەمژمێر سێ ئێڤاری د ناڤ ئەرد و جەماوەرێ خوە دا مێڤانداریا یانەیا خاك یا هەولێری كەت.
سێمێل پێدڤی ب جەماوەری یە بۆ سەركەفتنێ
نوونەرا پارێزگەهێ ل رێزا 11 دهێت ب كۆمكرنا 16 خالان پشتی ژ دەستدانا هیڤیێن دەربازبوونێ دێ بزاڤێ كەت د یاریا ئەڤرۆ دا سەركەفتنێ بینت ژبۆ مسۆگەركرنا مانا خوە، بەرانبەری وێ یانەیا خاك ئەوا ب21 خالان رێزا پێنجێ دهێت دناڤ هەڤڕكیێن پلێتا دەربازبوونێ دایە، لەوما ئەڤ یاریە بۆ كوڕێن سێمێلێ ب سانەهی نابیت تایبەت پشتی دو یاریزانێن وێ یێن كاریگەر مەحمود محەمەد و نزار ئەحمەد ژبەر نەرازیبوونا وان ل سەر بڕیارێن دادڤانی د یاریا بۆری دا دگەل سلێمانیە ب كارتا سۆر هاتبوونە دوورئێخستن و یانە ب كۆژمێ 250 هزار دیناران هاتیە سزادان.
سەرپەرشتێ تیما سێمێلێ پەروەر حسێن داخواز ژ جەماوەرێ یانێ دكەت ل یاریگەهێ بەرهەڤبن و بۆ ئەڤرۆ گۆت: ئەڤ یاریە گەلەك یا گرنگە و دێ چارەنڤیس بیت و دو دلیێ دناڤ رێزێن تیمێ دا ئێكلا كەت ژبەركو سەركەفتن ئانكۆ مسۆگەركرنا مانا خوە د خولێ دا، لەوما هیڤییا مە ئەوە جەماوەرێ سێمێلێ بۆ ناڤێ باژێرێ خوە پشتەڤانیێ بكەن، سەرباری ئاستەنگان ئەم رژدین مانا خوە پارێزین و یاریا ئەڤرۆ سەركەفتنێ بینن.
