ل سالا بهێت ناڤ نڤێسینا حەجێ دێ بیتە ئونلاین
ئەڤرۆ
هەرهین محەمەد:
سەرمەد جەمیل، رێڤەبەرێ حەج و عومرێ ل پارێزگەها دهۆكێ گۆت: ل سالا 2017 و 2018 و 2019 پشككێشان هاتەكرن بۆ چار هزار ناڤان و هندەك مامەلە مە ب رێڤەبرن و ل سالا 2020 پەژیكا كورونایێ هات و حەج و عومرە نەهاتەكرن و ئەڤ ناڤە وەكو خوە مان هەتا سالا 2022 و هێشا رێنمایێن خوە پارێزیا ژ پەژیكا كورۆنایێ مابوون و وەلاتێ سعودیێ بریاردا كەسێن دانعەمر نابیت ئەڤ سالە ئەم قەبول كەین ژ بۆ حەجێ.
زێدەتر گۆت: بەهرا مە ژی كێم بوو وەلاتێ سعودیێ ژ سێ ملیون ڤیزا كرە ئێك ملیون ڤیزە و بەهرا عیراقێ كرە پازدە هزار كەس و دیسان بەهرا كوردستانێ ژ چار هزار كەسان كرە دو هزار كەس و بەهرا پارێزگەها دهۆكێ كرە چار 450 كەس و ل وی دەمی ل دووڤ بریارا وەلاتێ سعودیێ مە ڤاڤارتنەك كر و كەسانێن دانعەمر و هاریكارێن وان مە دانە رەخەكی و ب تنێ تەخا گەنجان مان و مە برنە حەجێ ل گەل لژنان هەموو بوونە 487 كەس ل سەرانسەری پارێزگەها دهۆكێ.
سەرمەد ئاشكرا ژی كر، ئەڤ سالە مە ئەو ناڤ یێن ئامادەكرین نێزیكی 600 ناڤن یێن سالا بوری ژبەر ژیێ وان یێ مەزن نەچوونە حەجێ وەلاتێ سعودیێ ژی بریاردا چ ئاستەنگ ژ كورۆنایێ نەمان، بەهرا مە ژی وەكو بەرێ زڤراند، نێزیكی 1100 كەسن و نێزیكی 600 ناڤ مە هەنە و دیسان ل سالا 2020 پشككێشان كربوو و یەدەك مە هەبوون و ئەو یەدەكە ژی مە هایداركرن و ئەم نوكە یێن مامەلێن وان ب رێڤە دبەین و بەرب دووماهیێ یە.
رێڤەبەرێ حەج و عومرێ زێدەتر ژی گۆت: ئەڤ سالە پاشخستن نینە و ب بریارا وەزارەتێ یە و ب فەرمی هاتیە ئیمزاكرن ب چ رەنگان پاشخستن و دواخستن بۆ سالا دووڤدا نینە و هەر كەسێ نەچیت سالەكا دی ماف نینە بچیتە عەرەبستانا سعودیێ بۆ حەجێ، یان دڤێت سەرەدانا رێڤەبەریێ بكەت، یان (تنازلێ) ژ وان رێنمایێن دیاركری بكەت، چونكو میكانزمەكا نوو یا ناڤ نڤیسانێ ل سەر ئاستێ نیڤدەولەتی دێ دەركەڤیت و دێ بیتە ئونلاین و نوكە كار ل سەر دهێتەكرن و خەلكێ مە ب رێكا سایتەكی و لینكەكی ئەوێ حەج نەكربیت ل دووڤ هندەك مەرجان ناڤێ خوە تومار بكەت.
