ب هەلوەستەكێ ئێگكرتی یانەیێن كوردستانێ دێ بەرسڤا لایەنێ ئیراقێ دەن
ئەڤرۆ
د داخویانیەكا تایبەت دا سەرۆكێ ئێكەتیا پایسكلڤانێن كوردستانێ بۆ رۆژناما ئەڤرۆ دیار كر سوبەهی دێ كۆمبوونەكا تایبەت یا یانەیێن دهۆك، هەولێر، كۆیە و یانەیا كچێن ئایش دگەل رێڤەبەرێ گشتی یێ وەرزشی ل هەرێمێ هێتە كرن ژبۆ دووماهی هەلوەست ل سەر پشكداری یان خوە ڤەكێشانێ ژ قۆناغا دویێ یا قارەمانیا ئیراقێ بۆ یاریا پایسكلان، پشتی ئێكەتیا ڤێ یاریێ یا ئیراقێ داخوازا یانەیێن كوردستانێ رەدكر كو ژڤانێ قۆناغا دویێ بهێتە گوهۆڕین ئەوا بڕیارە ل 20 هەتا 22ێ ڤێ هەیڤێ ل باژێرێ بەسرا بهێنە كرن.
زێدەتر ناڤهاتی گۆت: هەرچار یانەیێن كوردستانێ ئەوێن پشكدار د قارەمانیا ئیراقێ دا ژ قۆناغا ئێكێ شیابوون رێزێن ئێكێ و دویێ بهێت، لێ ژبەركو دەمێ ئەنجامدانا قۆناغا دویێ دكەڤیتە د هەلكەفتا نەتەوەیا كو چەژنا نەوروزێ یە بنڤێسارێن فەرمی داخواز ژ ئێكەتیا پایسكلڤانێن ئیراقێ كریە كو ئەڤ ژڤانە بۆ حەفتیەكێ پاشڤە بچیت پێخەمەت دەلیڤە دان بۆ راهێنەر و یاریزانێن یانەیێن كوردستانی دناڤ هەلكەفتا نەوروزێ دابن، لێ مخابن پشتی داخوازی هاتیە كرن ئەوان رەدكر ژڤانێ قارەمانیێ بهێتە گوهۆڕین، لەوما ژبۆ ئێگكرتنا هەلوەستەكێ نەتەوەیی بڕیارە سوبەهی وەكو سەرۆكێ ئێكەتیێ دناڤ كۆمبوونا دگەل هەرچار یانەیان و رێڤەبەرێ وەرزشی یێ هەرێما كوردستانێ سەردار ئیسماعیل ژبۆ دووماهی بڕیار ل سەر پشكداریێ یان خوە ڤەكێشانێ.
ژلایەكێ دووڤە هشیار فەریقی گۆت: مە گەلەك بزاڤ كرن لایەنێ ئیراقێ رازی كەین لێ ئەو رژدبوون، هەر بۆ بیرهاتن ژی هەردەمێ هەلكەفتەكا نەتەوەیی یان یا ئاینی ل ئیراقێ هاتبا كرن ئەوان قارەمانی بۆ حەفتیەكێ پاشڤە دبرن یان پێشڤە دئینا، ئەڤچا وەكو مافێ مە یێ رەوا دڤێت ئێكەتیا پایسكلڤانێن ئیراقێ ژی رێزێ ل هەلكەفتێن مە بگریت و بڕیارا پاشڤەبرنا قارەمانیێ بكەت.
