شارەزایەكا قانوونی: نەبوونا ڤیانێ و باوەریێ خێزانێ ژ ناڤ دبەت
ئەڤرۆ
هەولێر، قائید میرۆ:
شارەزایەكا قانوونی و چالاكڤانا مەدەنی ئاماژە بڤێ چەندێ كر، پێدڤیە خێزان ل سەر بنەمایێ رێزگرتن و ڤیانێ بهێتە پێكئینان و بەرۆڤاژی نەبوونا باوەریێ دێ خێزانێ بەر ب هەلوەشاندنێ بەت و گۆت: ئێك ژ ئاریشێن دناڤبەرا ژن و زەلامان دا ئینانا هەڤژینا دویێ یە و پێدڤیە بۆ هەر پێنگاڤەكا وەسا لێك تێگەهشتن هەبیت.
ئاوڕینگ شێخ عەلی، شارەزایا قانوونی و چالاكڤانا مەدەنی بۆ رۆژناما ئەڤرۆ دیار كر كو» ل سالا ٢٠٠٨ێ قانوونا بارێ كەسی هاتیە راستڤە كرن گۆهۆڕین ب سەر قانوونێ داهاتیە و ئینانا ژنا دویێ هاتیە مەرجدار كرن و گۆت: (ئەم زێدەتر مللەتەكی موسلمانین و ل گورەی ئاینێ پیرۆزێ ئیسلامێ ژی رێك دایە ئینانا ژنەكێ زێدەتر بەلێ ئاینی ژی مەرج داناینە بۆ كەسێن دخوازن بكەنە زێدەتری ژنەكێ، ئانكو هەكە كەسەكی ئەو مەرج تێدا هەبن یێن ئاینی دیار كری یان ژی دناڤ قانوونێ دا هاتین ماف هەیە ژنەكێ زێدەتر بینیت).
ئاورینگێ دیار ژی كر كو د جڤاكێ دا بێگومان زۆر كەس هەنە ئەو مەرج ژێ ناگرن و زێدەتری هەڤژینەكێ هەیە و گۆت: (ب دیتنا من ئەڤە ڤەدگەڕیت بۆ رێكەفتنا دناڤبەرا هەڤژینان، بەلێ ئایین دبێژیت هەكە هوین نەشیان یەكسانیێ بكەن بلا هەر ژنەك بیت، ب باوەریا من ئینانا ژنا دویێ زێدەتر گرێدایی خێزانێ یە و هەكە زەلام پێدڤی پێ هەبیت و ل گەل هەڤژینا ئێكێ یێ رازی بیت ئەڤە ئاساییە و كێشە تێدا نینە).
شارەزایا قانوونی گوتژی: (پێدڤیە رێز و ڤیان دناڤبەرا ژن و زەلامان هەبیت، چونكی هەموو پەیوەندیەك بۆ بەختەوەریا مرۆڤیە چەندین زەلام و ژن ل گەل ئێك رێكبن هند دێ د بەختەوەر بن د ژانا خوەدا و نابیت كار بگەهیتە ئێكدو شكاندنێ، چونكی هەموو پەیوەندیەك دڤێت ل سەر بنەمایێ رێز و ڤیانێ بیت، هەركارەك ل سەر بنەمایێ رێزگرتن و ڤیانێ بیت، هندەك زەلاما ژنا دویێ ژی نینە، بەلێ چ خۆشیا بۆ هەڤژینا خوە ناهێلیت). مال ئاوڕینگ شێخ عەلی د بەردەوامیا ئاخفتنێن خوەدا دیار كر كو مال وەكی شانا هنگڤینیە و ئەركێ ژن و زەلامانە هەموو شیانێن خوە ب مەزێخن بۆ ڤێ چەندێ شانەیەكا جوان بەرهەم بینن، زۆربەیا خێزانان زارۆك هەنە و نابیت ب شێوەیەكی رەفتارێ بكەن كارتێكرنێ ل سەر زارۆكێن وان پەیداكەت، باوەری مەرجە هەبیت دناڤبەرا هەڤژینان و هەر خێزانەكا ل سەر بنەمایێ باوەریێ بهێتە دامەزراندن دێ خێزانەكا سەركەفتی بیت و گۆت: (بەرۆڤاژی نەبوونا باوەریێ دێ بیتە ئەگەرێ تێكدانا خێزانێ و پەیدابوونا ئاریشان، ژبەركو هەكە باوەری نەما ئاریشێن زۆر بچووك دێ مەزن بن و خێزان بەر ب ئالۆزیان بچیت، وی دەمی خێزان بەر ب شەرۆ ئاشوپ و تێكچوونێ دچیت دەمێ رێز و ڤیان نەمینیت دناڤبەرا ژن و زەلامان، پێدڤیە هەموو خێزان رێز و ڤیانێ بكەتە پیڤەر بۆ ئاڤاكرن و بەر ب پێشبرنا خێزانێ).
