پایسكلڤانێن دهۆكێ بەرهەڤیان بۆ پاراستنا ناسناڤێ خوە دكەن
ئەڤرۆ
بڕیارە سێ شەمبیا بهێت تیما پایسكلڤانێن یانەیا دهۆك ل سەر ئاستێ تازەپێگەهشتیان دەست ب هەڤڕكیێن قۆناغا دویێ یا قارەمانیا ئیراقێ بۆ ئاستێن جودا بكەت ئەوا دێ سوبەهی ل باژێرێ بەسرا بۆ ماوەیێ سێ رۆژان بەردەوامبیت.
ل دۆر دووماهیی بەرهەڤیێن تیما دهۆكێ راهێنەر تارق سەعید بۆ رۆژناما ئەڤرۆ گۆت: ژبەركو قارەمانیا ئیراقێ ب چار قۆناغا دەرباز دكەت ل دووماهیێ دێ هەموو ئەنجامێن وێ هێنە كۆمڤەكرن بۆ قارەمانا ئیراقێ یا وەرزێ 2023ێ، لەوما پشتی ناسناڤێ قۆناغا ئێكێ دەستخوەڤە ئینایی، بۆ قۆناغا دویێ بەرهەڤیێن باش هاتینە كرن سەرباری ژڤانێ قارەمانیێ گۆنجایی نەبوویە، لێ پشكداریا یاریزانێن مە ژ نەچاری بوو ژبەركو چەند ژوانا د ناڤ رێزێن هەلبژارتیێ ئیراقێ دانە و هەكە پشكدار نەبان دا كارتیكرنێ ل سەر وان كەت، گەشبینم بۆ هەرسێ قۆناغێن بهێت دگەل پشتەڤانیا بەردەوام یا كارگێریا یانێ دێ سەرێ لیستێ پارێزین و ناسناڤی دەستخوەڤە ئینن.
بۆ زانین نوونەرا پارێزگەهێ د قۆناغا ئێكێ دا بۆ بەریكانەیا گشت تیمان بۆ درێژاهیا 16كم رێزا ئێكێ هاتبوو ئەوا ب پشكداریا 11 یانەیێن ل سەر ئاستێ تازەپێگەهشتیان ل پایتەختێ ئیراقێ بەغدا هاتبوو ئەنجامدان، ل سەر ئاستێ هەڤڕكیێن تاك یاریزانێن دهۆكێ رێزێن سێیێ هەتا شەشێ كونترۆل كربوون ئەوژی ئاریوس سلێمان، یوسف بەرەڤان، محەمەد سادق و یوسف جیهان و هەڤالێ وان ئیبراهیم سەلیم رێزا دەهێ هاتبوو.
