جۆدۆیا پارێزگەهێ كۆنترۆلا قارەمانیا كوردستانێ كر
قەیس وەیس:
سێ یانەیێن پارێزگەها دهۆكێ شیان ناسناڤێ قارەمانیا جۆدۆیا كوردستانێ ل سەر ئاستێ ژیێن جودا بۆ كوڕأن و كچان ب د ەستڤە بینن پشتی د هەڤڕكیێن واندا ئەوا یانەیێن پارێزگەهێن دهۆك، هەولێر، سلێمانی و كەركوكێ پشكداری كرین كو ژلایێ ئێكەتیا جۆدۆیا هەرێما كوردستانێ ل هۆلا گرتیا یانەیا دهۆك هاتیە كرن.
ل سەر ئاستێ كوڕان 10 یانە بۆ 15 ئاستێن جودا پشكداربوون، ل سەر ئاستێ كچان شەش یانە پشكداربوون چار یانەیێن پارێزگەها دهۆكێ و دو یێن سلێمانیێ بوون و ئەنجام بڤی رەنگێ خوارێ ب دووماهی هاتن.
ل سەر ئاستێ كوڕان بۆ تازەپێگەهشتیان، ئاكرێ ناسناڤ دەستڤەئینا، ئارارات و سێمێل رێزێن دویێ و سێیێ هاتن، ل سەر ئاستێ پشكۆژان یانەیا جیهان رێزا ئێكێ، سێمێل و هندرین رێزێن دویێ و سێیێ هاتن.
ل سەر ئاستێ كچان بۆ پشكۆژان، یانەیا ئافرەتێن دهۆكێ بوونە قارەمان، یانەیا دهۆك رێزا دویێ و بەختیاری رێزا سێیێ هات، ل سەر ئاستێ تازەپێگەهشتیان یانەیا پیرس بوو قارەمان، یانەیێن نەرورۆز و دهۆكێ رێزێن دویێ و سێیێ هاتن.
