سێمێلێ دووماهی دەلیڤەیا دەربازبوونێ ژ دەستدا
ئەڤرۆ
د داخویانیەكێ دا چێكرێ سەرۆكێ یانەیا سێمێل یا وەرزشی و سەرپەرشتێ تیما تەپا پێی ئەوا پشكدار د خولا پلا ئێكا كوردستانێ دا دیار كر پشتی د یاریا بۆری دا دگەل خودانێن ئەردی قەلادزێ ب گۆلەكێ وەكهەڤیبوویی دەلیڤەیا دووماهیێ یا دەربازبوونێ بۆ پلێتا سێیێ یا پلا نایاب ژ دەستدا.
زێدەتر پەروەر حسێن بۆ رۆژناما ئەڤرۆ گۆت: وەرزێ ئەڤ سالە بوو مە یا هەڤڕكیێ ل سەر پلێتا دەربازبوونێ ب دووماهی هات پشتی دو خال دگەل خودانێن ئەردی قەلادزێ ژ دەستداین و مانا خوە د خولێ دا مە پاراست، د نوكە دا مە 20 خال كۆمكرینە و رێزا 11ێ دهێن و دو یاری ماینە هەكە سەركەفتن هاتبانە تۆماركرن دا پێشڤە هێنە رێزا شەشێ و ڤەگەڕێنە د هەڤڕكیان دا ژبەركو ئەو یانەیێن رێزێن پێشیا مە بتنێ ئێك یاری مابوون و دو هەتا سێ خالان دا ژ مە زێدەتر بن، لێ یاریا بۆری ئەو دەلیڤەیا دووماهیێ یا دەربازبوونێ مە ژ دەستدا و بێ هیڤی ماین و یاریێن مایی وەكو رۆتین بن هەتا خول ب دووماهی بهێت.
زێدەتر ناڤهاتی دیاركر ئێك ژ ئەگەرێن دەستدانا خالان ڤەدگەڕێتە خەلەتیێن بەردەوام یێن دادڤانان كو چەند یاریان دا ئەم بێ بەهركرینە ژ سەركەفتنان یان خوسارەتیێن نە ژ هەژی بووینە و گۆت: بۆ وەرزێ بهێت هەرزو دێ هزر د دانانا پلانەكا دووم درێژ دانین و گوهۆڕینێن مەزن د ناڤ رێزێن تیمێ دا هەبن و ئارمانجا مە ژبلی پشكداریێ دێ هەڤڕكی بیت بۆ دەربازبوونێ ئەڤەژی ب سانەهی نابیت هەكە كاودانێن مە یێن دارایی وەكو یێن ئەڤ سالە د لاوازبن سەرباری ب سۆپاسی ڤە پشتەڤانیا سنۆردار یا پارێزگارێ دهۆكێ بۆ یانێ كری.
