هەلوەستێ دو یانەیێن پارێزگەهێ د خولا كوردستانێ دا د مەترسیدارن
ئەڤرۆ
پشتی ب دووماهی هاتنا گەڕا 22ێ ژ هەڤڕكیێن خولا پلا نایابا كوردستانێ یا تەپا پێی، ئەنجام و رێزبەندیا هەردو یانەیێن دهۆك و زاخۆ د هێلا مەترسیێ دانە و ل بن گەڤێن داكەفتنێ بۆ پاشڤەچوونا پلا ئێك دانە، ژلایێ خوەڤە یانەیا ئاكرێ بەردەوامە ل سەر ئانجامێن خوە یێن باش و پێنگاڤەكا باشتر بۆ رێزێن پێشیێ هاڤێتیە.
• بۆچی دهۆك و زاخۆ نەشیاینە خوە قۆرالبكەن؟
تیما تەپا پێی یا یانەیا دهۆك د لاوازترین ئاست و ئەنجامدایە، سەرباری گوهۆڕینا سێ راهێنەران و چەندین یاریزانان و هەروەسان سەرئێخستنا نێزیكی هەشت یاریزانێن تیما خوە یا خولا ئیراقێ ژوانا پیشەكارن لێ نەشیایە هەلوەستێ خوە باش بكەت ئەوا ژ سەرجەمێ 20 یاریان بتنێ پێنچ سەركەفتن ئیناین، دو وەكهەڤی و 13 خوسارەتی و ب17 خالان رێزا 15 و دووماهیێ دهێت، ئەڤ ئامارە مەترسیدارن و جهێ سەرنجراكێشێ نە، ژبەر كو یانەكا ب ناڤ و دەنگ و د ماوێ یاریێن بۆری دا ئەو گوهۆڕینێن هاتینە كرن چ مفا ژێ نە وەرگرتیە، لڤێرە پرسیار ئەوە ئەرێ چ ئەگەرن كو هەتا نوكە تیما دهۆكێ نەشیایە خوە ژ رێزا دووماهیێ قۆرتالبكەت؟
ژلایێ خوەڤە هەمان ئاست و ئەنجامێن لاواز بووینە بەهرا تیما یانەیا زاخۆ ئەوا ژ 21 یاریان بتنێ چار سەركەفتن هەنە، حەفت وەكهەڤی و 10 خوسارەتی، ب كۆمكرنا 19 خالان رێزا 14ێ و بەری دووماهیێ دهێت، ل دووڤ دەنگۆباسێن بەری چەندەكێ هاتبوونە بەلاڤكرن تیما زاخۆ نەشیایە چ یاریزانێن پیشەكار ل سەر تیمێ زێدەكەت پشتی كو ل قۆناغا ئێكێ هندەك پیشەكار زێدەكربوون ئەو یاریزان نەماینە دگەل ئەوان، دیسان كارگێریا یانێ بتنێ دڤیا ببیتە جهێ تاقیكرنێ بۆ كۆمەكا گەنجێن زاخۆ لێ ئەڤە نابیتە بۆهانە بۆ پشتگۆه هاڤێتنا تیمێ ئەوا د مەترسیا داكەفتنێ دا و دڤێت رێكە چارەسەری بوو بهێنەكرن.
• ئاكرێ نوونەرا پارێزگەهێ یا ب هێزە
بەروڤاژی هەردو یانەیێن دهۆك و زاخۆ، تیما تەپا پێی یا یانەیا ئاكرێ ئاست و ئەنجامێن باش هەنە و ئەو گوهۆڕینێن د ڤەگۆهاستنێن زڤستانێ دا كرین سەركەفتی بوون، ژبەر كو شیایە رێژا سەركەفتنان زێدەبكەت ژ چار بۆ هەشت سەركەفتنان، بەرانبەر شەش وەكهەڤی و شەش خوسارەتی هەبووینە و ژ رێزا12ێ پێشڤە بهێتە رێزا پێنجێ ب 30 خالان بتنێ هەشت خال د ناڤبەرا وێ و خودانا سەرێ لیستێ دا یانەیا ئارارات هەیە، یاریێن بهێت دەلیڤەكا باشە بۆ ئاكرێ یا پایتەختێ نەوروز كو بەردەوامیێ بدەتە سەركەفتنا بۆ رێزێن باشتر و هەكە بەردەوامبیت ل سەر ئەنجامێن باش دوور نینە هەڤڕكیێ ل سەر لیستێ ژی بكەت.
