راهێنەرێ دهۆكێ: یاری ب سانەهی نابیت لێ رژدین رێزبەندیا خوە بپارێزین
ئەڤرۆ
چاڤەڕێ دهێتە كرن ئەڤرۆ ل دەمژمێر 9:30 شەڤ تیما تەپا پێی یا یانەیا دهۆك ل یاریگەها شەعب یا نێڤدەولەتی ببیتە مێڤانا یانەیا نەفت یا بەغدایی ژ چارچووڤێ هەڤڕكیێن گەڕا22ێ ژ خولا پلا نایابا ئیراقێ ئەوا بڕیارە پێنچ یاری بهێنە ئەنجامدان.
– ئامار د بەرژوەندیا دهۆكێ دانە
رێزبەندیا تیما یانەیا دهۆك یا شەشێ یە ب كۆمكرنا 35 خالان ژ نەه سەركەفتن، هەشت وەكهەڤی و چار خوسارەتی هەنە، برێنس ئۆبۆكۆ هێرشبەرێ تیمێ هەشت گۆل تۆمارینە كێمتر گۆلەكێ ژ خودانێ سەرێ لیستێ یاریزانێ یانەیا نەوروز كلاودیۆ ئۆلێڤر رێزا دویێ دهێت، ژلایێ خوەڤە یانەیا نەفت 16 خال كۆمكرینە و رێزا 18ێ دهێت، ئامارێن هەردو یانەیان د بەرژەوەندیا ئەلهۆیێن چیا دانە كو هەشت سەركەفتن هەنە بەرانبەر چار بۆ نەفتێ و شەش وەكهەڤی بووینە، مەزنترین سەركەفتن یا دهۆكێ بوو ل وەرزێ 2000-2001 ژ خولا پلا نایاب ئەوا ب چار گۆلان بێ بەرانبەر ب دووماهی هاتی.
– ئەلهۆیێن چیا بەرهەڤن بۆ سەركەفتنێ
د داخویانیەكێ دا بۆ رۆژناما ئەڤرۆ سلێمان رەمەزان راهێنەرێ تیما دهۆكێ گۆت: بۆ هەر یاریەكێ ئەم راهێنان و بەرهەڤیێن خوە دكەین و پلان و شێوازێ یاریێ جۆدانە لێ هەموو یاری بۆ مە دگرنگن و بهێزن، ژبلی هەردو یاریزانان محەمەد نیزال ژبەر هنگاڤتنێ و سیابەند عەگید ژبەر سێ كارتێن زەر هەموو یاریزان بەرهەڤن بۆ دەستڤە ئینانا سەركەفتنێ و زێدەكرنا سێ خالان ل سەرجەمێ كۆمكری ژبۆ پاراستنا رێزبەندیا خوە یا شەشێ ژبەر ئەو یانەیێن ل بن تیما مە جووداهیا خالان نێزك بووینە و دڤێت جهێ خوە پارێزین و بەردەوامیێ بۆ ئاست و ئەنجامان بكەین، ب هیڤی نە بشێن بگەهینە ئارمانجا خوە و من باوەری ب هەموو یاریزانان هەیە.
ژ یاریێن دی یێن ئەڤرۆ، نەوروز دێ سیناعە مێڤان كەت، دیوانیە- شورتە، نەفت ئەلوەسەت- حدوود، ئەلقاسم- نەفت ئەلبەسرا، سوبەهی زاخۆ ل دەمژمێر 9:30 شەڤ د كۆپیتكا یاریێن ڤێ قۆناغێ دا مێڤانداریا زەورا كەت و راپۆرتا ڤێ یاریێ بۆ سوبەهی هێتە بەلاڤكرن.
ل دووڤ ژێدەرێن نێزیك ژ یانەیا دهۆك حەفت یاریزانێن دی پشكداری یاریا ئەڤرۆ نابن ژبەر ئەگەرێن جۆدا ئەو ژی، هەردو گۆلپارێز ئەحمەد حەمید و موسا شكر، پیشەكار نۆرۆ سولێ، وەلید سەلمان، حەسەن عیماد، محەمەد عەباس و حسێن نەجم.
