ئاریشێن ل رەمەزانێ پەیدادبن دێ چاوا چارەسەركەی؟
ئەڤرۆ
بەرپەرێ ساخلەمیێ:
رۆژیگر تووشی هندەك ئاریشەیێن سڤك دبن و دبنە ئەگەرێ هندەك نەخوشیان ژ ئەنجامێ كێمبوونا خوارنێ و ڤەخوارنێ، ژ گرنگترین وان ئاریشەیان ژی:
1- ئێشانا سەری: سەرئێشان پەیدادبیت ژ ئەنجامێ كێمبوونا رێژا شەكرێ دخوینێ دا ژ ئەگەرێ راوەستیانێ ژ خوارنا كەرستەیێن شرین ئەوێن دبنە هاندەر بۆ بەرهەمئینانا هێزێ یان ژ ئەنجامێ راوەستیانێ ژ كارئینانا جگارەیان ل دەڤ جگاركێشان یان نەڤەخوارنا چایێ و ڤەهوێ كو كەرستێ كافایین دناڤدا هەیە و كارتێكرنێ ل كوئەندامێ دەماران دكەت. چارەسەری ژی ئەوە كو بێهنڤەدان هەبیت و گەلەك لەشێ خۆ نەوەستینن و گەلەك نەچنە ل بەر روناهی و دناڤ قەرەبالغێ دا، ل گەل ڤێ چەندێ ژی باشترە رۆژیگر تەڤاڤیا لەشێ خوە ژ تشتێن شرین دماوەیێن فتارێ و پاشیڤێ دا وەربگریت.
2- عێلنجی: عێلنجی پەیدادبن ژ ئەنجامێ هاتنەخوارا فشارا سروشتی دناڤ رووڤیكان دا، ئەوژی ل دەمێ مرۆڤ بەرئاتافی بێهنەكا نەخوش یان دیمەنەكێ نەجوان دبیت، یان ژ ئەنجامێ ئێشانەكا دژوار یان وەستیانێ د ماوێ رۆژیگرتنێ دا دبیت، بۆ چارەسەریێ نوشدار شیرەتان ل مە دكەن هەناسەیا خوە هێدی و كوور ب هلكێشین، ب مەرجەكی كو هلكێشانا بێهنێ ب رێیا دفنێ بیت و بەردان ب رێیا دەڤی بیت، و گەلەك جاران ڤێ كریارێ دوبارە بكەن دماوێ رۆژیگرتنێ دا و باشترە سەرێ مرۆڤی یێ چەماندی بیت داكو دلرابوون پەیدانەبیت، هەروەسان شیرەتان دكەن كو پشتی فتارێ دەرزیكێن ( بی 6) بهێنە دانان.
3- گێژبوون: گەلەك جاران رۆژیگر تووشی گیژبوونا ژ نشكان ڤە دبیت، ب تایبەت هەكە ب لەز راببیت، بۆ چارەسەریێ دشیاندایە رۆژیگر هێدیانە راببیت و گەلەك ئاڤێ ڤەخوت داكو كارێ خولا خویناوی دروست ببیت و بشێت خوینێ پالدەت بۆ مێشكی.
4- تێكچوونا دیتنێ: ئەوژی پێكهاتیە ژ تەنگەزاریێن دیتنێ و شێلیبوونا چاڤان و پشتی رۆژیگر فتارێ دكەت د پتریا جاران دا ئەڤ چەندە نامینیت.
5- هشكبوون: ژ ئەنجامێ كێمبوونا رێژا ئاڤێ هشكبوون پەیدادبیت، ئەوژی ل دەمێ مرۆڤ گەلەك ل بەر تاڤێ ب راوەستیت و ژ نیشانێن وێژی هشكبوونا دەڤی و مرۆڤ حەز دكەت دلێ خوە راكەت و لێدانێن دلی زێدە دهێنە لێدان و زەڤلەكێن لەشی دئێشن. بۆ چارەسەریێ ژی پێدڤیە ئاڤ و شلەمەنیێن كەل گەلەك بهێنە ڤەخوارن و خوارنێن ترش و تیژ نەهێنە خوارن.
