یانەیا بجیل ئەگەرێن خوسارەتیا تیما خوە دیار كرن
رەمەزان زەکەریا:
د داخویانیەكێدا سەرۆكێ یانەیا بجیل یا وەرزشی ئاشكراكر ئەگەرێن سەرەكی یێن خوسارەتیا تیما وان یا تەپا پێی ژ خولا پلا دو یا كوردستانێ دگەل یانەیا شێلادزێ یاریزانێن وان ل ئاستێ پێدڤی نەبوون و خەلەتیێن دادڤانان و پیڤەرێ یاسایی د یاریگەهێ دا نەبوو.
زێدەتر رەهیل شەعبان بۆ رۆژناما ئەڤرۆ گۆت: هەرچەندە ئاستێ یاریزانێن مە د یاریا بەرانبەر شێلادزێ باش نەبوو لێ ئەو خەلەتیێن دادڤانی كرین ژوانا دوورئێخستنا یاریزانەكێ مە د خولەكا50ێ دا ب كارتا سۆر و نەبوونا مەرجێن دروست یێن یاسایی د یاریگەهێ دا ئەگەرێن سەرەكی یێ، خوسارەتیا تیمێ بوون، ئەم نوزانین بۆچی ئێكەتیا تەپاپێی رازیبوو یاری ل یاریگەها شێلادزێ بهێتە كرن كو درێژاهیا یاریگەهێ 90م و پانیا وێ 50م بەرۆڤاژی چو پیڤەرێن یاسایا تەپاپێی تێدانەبوون، وەكو مافەك مە سكالا لسەر دادڤان و سەرپەرشتیاریێ یاریێ و جەماوەرێ یانەیا شێلادزێ ئەوێن بووینە ئەگەرێ شكاندنا جامێن پاسا مە تۆماركربوون، لێ مە ئاریشە دگەل چ یاریزان و كارگێریا یانەیا شێلادزێ نەبوون ئاریشا مە یاریگەهـ و جەماوەرێ وان بوون، ژلایێ یاریێ مە چو تێبینی نەبوون لێ بتنێ ئەو ئەگەرێن مە دیاركرین كارتیكرنا نەرێنی هەبوو.
بۆ زانین ل شەمبیا بۆری ئێكەتیا تەپا پێی بڕیاردا یاریێن بهێت یێن یانەیا شێلادزێ ژ دەرڤەیی یاریگەها وێ بێ جەماوەر بیت و ب 300 هزار بهێتە سزادان، ئەڤ بڕیارە بوویە جهێ نەرازیبوونا یانەیا شێلادزێ ئەوا دیاركری دێ هەلویستێ خوە راگەهینن.
