چاڤەڕێی یاریەکا بهێز و ئاگرین ل مەدرید دهێتە کرن
ئەڤرۆ
چاڤەڕێ دهێتە كرن ئەڤرۆ ژی ل دەمژمێر 10ی شەڤ دو یاریێن دی یێن ئاگرین و بهێز ژ چارچووڤێ گەڕا ئێكێ یێن هاتنێ یا قۆناغا چارێك دووماهییا قارەمانیا یانەیێن ئۆرۆپا قارەمانێن خولا چامپیۆنز لیگ بهێنە ئەنجامدان.
چێلسی گەڤێن راوەستاندنا ریالێ دكەت
جەماوەرێ وەرزشی ل جیهانێ تایبەت پشتەڤانێن هەردو یانەیان چاڤەڕێ ڤێ یاریێ نە كو دهێتە هژمارتن ئێك ژ دیدارێن ئاگرین، ریال مەدرید قارەمانا چامپیۆنزا وەرزێ بۆری ل یاریگەها خوە سانتیاگۆ بێرنابیۆ دێ مێڤانداریا چێلسی یا ئنگلتەرایێ كەت، گوهۆڕینێن ڤێ دووماهیێ یێن یانەیا ئنگلتەرایێ تایبەت پشتی چوونا تۆماس تۆخێل و هاتنا گێرهام پۆتەر ئەوێ هەرزوو دەست ژ كارێ خوە بەردایی و لجهێ وی فرانك لامبارد هاتیە دانان كارتیكرن ل سەر ئاستێ وێ كریە د خولێ دا لێ داخویانیێن راهێنەری ب ڤەگەڕاندنا هێزا چێلسی د چامپیۆنزێ دا و راوەستاندنا ریالێ بووینە گەڤ ل سەر یانەیا ئسپانی.
دیدارێن ئێكلاكەر و دەربازبوونێ
سەرجەمێ گشتی یێ دیدارێن دناڤبەرا ریالێ و چێلسی نەه جاران بووینە و پرانیا وان یاریان ژی ئێكلاكەر بۆ ناسناڤی و دەربازبوون بۆ قۆناغێن دووماهیێ بووینە، د چامپیۆنزێ دا چار جاران بەرانبەر ئێك بووینە، ل وەرزێ 2021-2022 د قۆناغا پێش دووماهیێ دا ژ هەردو یاریان چێلسی دەربازبوو یاریا دووماهیێ ب وەكهەڤیەك و سەركەفتنەك، ل وەرزێ بۆری ژ چارێك دووماهیێ دا ریال دەربازبوو یاریا پێش دووماهیێ د یاریا ئێكێ دا3-1 سەركەفتن بوو و یا دویێ 3-2 خوسارەت بوو سەرجەم 5-4 دەبازبوو.
میلان و ناپۆلی شەڕێ ئیتالی بۆ بەرەیی ئۆرۆپا ڤەگۆهاستیە
چاڤدێر و پشتەڤانێن خولا ئیتالیایێ چاڤەڕێ یاریەكا ئاگرینن دەمێ یانەیا میلان ل یاریگەها خوە سان سیرۆ مێڤانداریا یانەیا ناپۆلی دكەت كو دهێتە هژمارتن هەڤڕكیەكا تایبەت و شەڕێ دو یانەیێن ئیتالی ژ دەرڤەیی خولا كالیجویێ، هەرچەندە یانەیا ناپۆلی سەرێ لیستا خولێ دهێت ب74خالان و نێزیكی ناسناڤی بوویە لێ یانەیا میلان هەڤڕكا وێ یا بهێزە و شیابوو د ناڤ ئەردێ ناپۆلی دا چار گۆلێن پاقژ ل سەر بینت، ئەڤ یاریە دێ وەكو تۆلڤەكرنێ بیت بۆ ناپۆلی و ژلایێ خوەڤە میلان دێ بزاڤێ كەت سەركەفتنا خوە یا مەزن د ناڤ ئەرد و جەماوەرێ خوە دا ل چامپیۆنزێ دا دۆبارە بكەت ڤە.
چەند دیدارێن بەرانبەر ئێك هەبووینە؟
هەرچەندە یاریا ئەڤ شەڤە دبیتە دیدارا ئێكێ یا ناڤبەرا هەردو یانەیان دا ژ چامپیۆنز لیگێ، لێ د خول و كۆپا ئیتالیا دا 171 جاران بەرانبەر ئێك بووینە و یانەیا میلان شیایە 68 یاریان سەركەفتنێ بینت و 247 گۆلان بەرانبەر 51 سەركەفتن بۆ ناپۆلی 193 گۆل تۆماركرینە و 52 یاری وەكهەڤی بووینە، ئامارێن میلان د چامپیۆنزێ دا بۆ جەماوەرێ وێ دلخوەشكەرن ژبەركو دیرۆكەكا باش و دەستكەفتان هەیە ئەو ژی شیایە حەفت جاران ناسناڤێ قارەمانیێ ب دەستڤە بینت بەرانبەر دا ناپۆلی 10 پشكداری هەنە لێ نەشیایە چو ناسناڤان بینیت.
