دێربییا دهۆك و زاخۆ چارەنڤیسە بۆ مانا خوە د خولێ دا
دهێتە چاڤەڕێ كرن ئەڤرۆ سێ شەمبی دەمژمێر 3:15 ئێڤاری حەفت یاری ژ گەرا 28ێ یا خولا كوردستانێ بۆ یانەیێن پلا نایاب یا تەپا پێی بهێنە ئەنجامدان، دێربیێ دهۆك و زاخۆ دهێتە هژمارتن یا خوە قورتلكرنێ و پاراستنا مانا خوە د خولێ دا ئێك ژ بهێزترین یاریێن ڤێ حەفتیێ یە.
• سەركەفتن پێنگاڤەكە بۆ پاراستنا پلا نایاب
بریارە تیما تەپا پێی یا یانەیا دهۆك ل یاریگەها خوە مێڤانداریا یانەیا زاخۆ بكەت د دێربیێ بەهدینان دا، ژبەركو زاخۆ بوویە ئیدارا سەربەخوە دێربیێ پارێزگەهێ ناهێتە هژمارتن، هەردو یانە د هێلا مەترسیا داكەفتنێ دانە و چو بژاردە نینن ژبلی دەستڤە ئینانا سێ خالان ژبۆ زێدەتر بلندكرنا چەنسێ مانا خوە د خولێ دا ب رێژەكا بلند، خودانێن ئەردی 26 خال كۆمكرینە ژ حەفت سەركەفتن و پێنچ وەكهەڤیان لێ13 خوسارەتی ژی هەنە و رێزا 15ێ و دووماهیێ دهێت، بەرانبەر دا تیما زاخۆ ب هەمان خالان لێ ب جووداهیا گۆلەكێ رێزا 14ێ و بەری دووماهیێ دهێت ژ شەش سەركەفتن، نەه وەكهەڤییان، ئەڤ یاریە دهێتە هژمارتن ب تاما یارییا دووماهیێ و چارەنڤیس بۆ هەردو یانەیان ژبەركو دو یاریێن دی بتنێ ماینە و دڤێت سەركەفتنێ بینن.
• ئاكرێ دێ بزاڤێن پاراستنا جهێ خوە كەت
تیما یانەیا ئاكرێ دێ ل هەولێرا پایتەخت بیتە مێڤانا یانەیا هندرین د یاریەكا ب سانەهی نابیت بۆ كوڕێن پایتەختێ نەورۆزێ ئەوا 32 خال كۆمكرین رێزا 10ێ دهێت و بزاڤێن وێ بۆ پاراستنا جهێ خوە یە پێخەمەت دانەكەڤیتە رێزێن دووماهیێ و پاشڤەچوونێ، هندرین35 خال یێن هەین رێزا چارێ دهێت.
ژ یاریێن دی یێن ئەڤرۆ، شێروانە- سۆران، دەربەندیخان- چارقۆرنە، پێشمەرگەیێ هەولێر- چەمچەمال، سیروانی نوو- برایەتی، سەید سادق- شەقلاوە.
