ئەرێ كاركرنا زەلامان ل جوانكاریێن ژنان نورمالە؟
ئەڤرۆ
هەهین محەمەد:
بەری نوكە كاركرنا زەلامان ل جوانكاریێن ئافرەتان ب تشتەكێ كرێت و كێم دهاتە دیتن، ژبەكو ئەڤ چەندە یا دوور بوو نەریتێن جڤاكێ كوردی، بەلێ نوكە پتریا جوانكاری و سەنتەرێن مە كورێن تایبەتمەند و خودان باوەرنامە د ڤی بواری دا كاردكەن و تەكنەلوژیایێ ژی كارتێكرن ل سەر جڤاكێ مە كریە كو ئەڤ تشتە بیتە نورمال لدەڤ جڤاكێ كوردی.
كچەك بناڤێ سەوسەن ئەحمەد ددەتەزانین كو بەری چەند سالان ل باژێرێ مە تشتەكێ ب شەرم بۆ زەلام ل جوانكارێن ژنان كار بكەت، چونكو ل گەل داب و نەریتێن مە یێن كوردی ناگونجیت و ژنێن قەستا جوانكاریێ دكەن هەموو د ئارام نینن و هەكە كەسەكی ل جوانكاریەكێ ژی كار كربا بەحسێ وی دهاتە كرن، بەلێ پشتی دەركەفتنا تەكنەلوژیایێ و تورێن جڤاكی كەفتینە بەردەستێ خەلكی ئەڤ چەندە ب رەنگەكێ نورمال هاتە دیتن.
سەوسەنێ گۆت: (نوكە ل هندەك سەنتەرێن جوانكاریێ یێن باژێرێ دهۆكێ كور كار دكەن و دەستپێكێ ل دەڤ من ژی تشتەكێ نەخوش بۆ كورەك پرچا من بۆیاغ كەت، یان هەركارەكێ دی یی جوانكاریێ بكەن، بەلێ بەری هەیامەكێ چومە سەنتەرەكی و كورەكی پرچا من بویاغ كر بۆ من دیار بوو وی كوری ژی د بوارێ جوانكاریێ دا خواندیە و نوكە بۆ من یا نورمالە).
هلوڤان حوسنی، ماموستایێ زانكۆیێ یە دیار كر، بۆ ڤی بابەتی دو لێنێرین هەنە وەكو لێنیرینا كارگێری و ئابوری و جڤاكی و ئایین، د لێنێرینا ئێكێ دا دشێن ب دیاردەكا سرۆشتی وەرگرین و دەرئەنجامێ وێ پێشكەفتن چێدبیت و جیهانگێریا ئەڤرۆ جیهان كریە گۆندەكێ بچویك و ئەڤە ژی وێ چەندێ دگەهینت كار وەكو بەرێ نەمینت و جورێ كاركرنی بهێتە گوهارتن و نوكە ئەو جوداهی نەمایە دناڤبەرا رەگەزێ نێرۆ مێ دا و نوكە پتر تەكەز ل سەر كارزانیێ دهێتەكرن.
ماموستایێ زانكویێ گۆتژی: (دیسان ژ وێ جیهانگێریێ ژی بكڕ گەلەك حەز ژ گوهورینێ و ستایلێن نوی دكەت و ژ ئەنجامێ ڤێ جیهانگێریێ دبیت گەلەك جاران بیك حەز كەت زەلام كارێ وێ بكەت و بەروڤاژی زەلام حەز دكەن ژن كارێ وی بكەت ژلایێ جوانكاریێ ڤە و ئەڤ جورێ داخوازیێ و د رەفتارێت بكری دا چێبووی وەل خودان كاری دكەت خوە ل ڤی جورێ داخوازیی بكەتە خودان دا كو پتر بكران بكێشتە خوە، دبیت ئەڤ جیهانگێریە رەنگەكێ چاڤلێكرنا بیانی بیت هەتا كو نوكە رەنگڤەدانا خوە ل سەر جڤاكێ مە كریە).
رەمەزان ئسماعیل، ڤەكولەرێ جڤاكیە دیار كر كو راستە ل ڤێ دووماهیێ دەركەفتیە كور ژی ل جوانكاریان كار دكەن و ل دەستپێكێ تشتەكێ نوی بوو هاتیە دناڤ جڤاكێ كوردی دا و نەهاتە قەبولكرن، لێ ل گەل بوورینا دەمی و تەكنەلوژیایێ هێدی هێدی ئەڤ دیاردە جارەكا دی ل هەرێما كوردستانێ ب تایبەت ل دهۆكێ سەرهەلداڤە و گۆت: (نابینم ئەڤە تشتەكێ جوان و گەلەك ژن هەنە دەمێ دچنە د جوانكاریێ ڤە دبیت نە یا ئارام بیت، چونكو دەمێ دچنە جوانكاریێ حەز دكەن ب ئارامی كارێ خوە بكەن ل گەل ژنان نەك زەلام ژی د جوانكاریێ ڤە یێ ئامادە بیت و گەلەك ژن و بیك ژی هەنە حەز ناكەن كارێ وان زەلام بكەن و ئەڤ تشتە ل گەل جڤاكێ مە و داب و نەریتان ناگونجیت).
