باسكێت بۆلا زاخۆ بەر ب دەستكەفتەكێ مەزن
ئەڤرۆ
بڕیارە سوبەهی دوشەمبی تیما باسكێت بۆلا یانەیا زاخۆ یاریەكا چارەنڤیس و دیرۆكی ل باژێرێ بەغدا ئەنجامبدەت، ئەوا دهێتە چاڤەڕێكرن ل دەمژمێر پێنجێ ئێڤاری ل هۆلا شەعب ببیتە مێڤانا هەڤڕكا خوە یانەیا نەفت ژبۆ دەستڤە ئینانا پلێتا دەربازبوونێ بۆ یاریا دووماهیا خولا پلا نایابا ئیراقێ هێتە كرن.
بەر ب دەستكەفتەكێ مەزن
تیما یانەیا زاخۆ ئەوا شیایی د دو یاریێن قۆناغا پلەیی ئۆڤ دا دو سەركەفتنان ل دووڤ ئێك ل سەر یانەیا نەفت بینت،
یا ئێكێ ل باژێرێ بەغدا بوو ب ئەنجامێ 83- 75 خالان، د یاریا دویێ دا ب83- 76 خالان سەركەفتن ئینانا و هیڤیێن دەربازبوونێ بۆ یاریا دووماهیێ گەشتر لێكرن كو سەرجەمێ گشتی دو سەركەفتنێن خولێ یێن یانەیا نەفت ل سەر زاخۆ و هەردو سەركەفتێن زاخۆ د پلەیی ئۆڤ دا ئەنجام بۆ وەكهەڤی 2-2 لێهاتبوو، لێ یاریا سوبەهی دێ یا ڤەبڕ بیت بۆ تۆماركرنا دیرۆكێ ئەو ژی هەكە زاخۆ ب سەركەفت دێ دەربازبیتە یاریا دووماهیێ كو دبیتە جارا ئێكێ د دیرۆكا خوە دا و دەستكەفتەكێ نوو بهێتە تۆماركرن.
جوتیار عەلی: ژ نەفتێ نا ترسین و بەرهەڤین بۆ سەركەفتنێ
جوتیار عەلی هاریكارێ راهێنەرێ زاخۆ گۆت: ئەم بەرانبەر دەرگەهێ دیرۆكەكا نوو و دەستكەفتەكێ مەزنن كو چ جاران نە هاتیە تۆماركرن د دیرۆكا یانەیا زاخۆ دا، هەمی هێز و شیان و هزر و گیانێ مە بۆ یاریا سوبەهی یە دگەل نەفتێ و چاوانیا سەركەفتنێ، سەرباری ئەركێ مە ب سانەهی نابیت ژبەركو بەرانبەر تیمەكێ یە خودان دیرۆكە لێ ئەم ژ نەفتێ نا ترسین و بەرهەڤین بۆ سەركەفتنێ، كارگێریا یانێ و ئیدارا سەربەخوەیا زاخۆ و هەموو جەماوەر پشتەڤانێن مەنە ب هەمی لایەكی ڤە، ب هیڤی نە ب گەهینە ئەو ئارمانجا مە دڤێت دەستكەفتەكێ مەزن بۆ ناڤێ زاخۆ بینن.
