كچێن بەرشەلۆنا بەری كوڕان ناسناڤێ ئسپانیا مسۆگەر كر
ئەڤرۆ
تیما كچێن یانەیا بەرشەلۆنا ناسناڤێ خولا پلا ئێكا ئسپانیا یا تەپا پێی مسۆگەر كر پشتی د یاریا شەڤا دەربازبوویی دا دگەل یانەیا سپۆرتینگ هۆلیڤیا ب سێ گۆلێن پاقژ سەركەفتی، د یاریا وان یا گەڕا 27ێ و بەری ب دووماهی هاتنا خولێ ب سێ گەڕان هاتیە كرن.
سەركەفتنا ل سەر سپۆرتینگێ خالێن وێ گەهاندنە 78 خالان ب جووداهیا 13 خالان ژ هەڤڕكا خوە یانەیا ریال مەدرید ئەوا ب 65 خالان رێزا دویێ دهێت، كچێن بەرشەلۆنا بێ دۆراندن 26 سەركەفتن ئیناینە، 108 گۆل تۆماركرینە بتنێ پێنچ گۆل ل سەر هاتینە تۆماركرن، ئەڤ ناسناڤە دبیتە یێ هەشتێ بۆ كچێن بەرشەلۆنا و بەرانبەر دا ریال مەدرید چ ناسناڤ دەستڤە نە ئیناینە.
بۆ زانین ل سەر ئاستێ كوڕان یانەیا بەرشەلۆنا ب جوداهیا 11 خالان ژ ریال مەدرید سەرێ لیستا خولێ دهێت و پێدڤی ب سێ یاریان هەیە ژبۆ مسۆگەركرنا خولێ، بەرشەلۆنا 79 خال كۆمكرینە و ریالێ 68 خال، بتنێ حەفت یاری ماینە بۆ دووماهی هاتنا وەرزێ ئەڤ سالە یێ خولا ئسپانیا.
