راهێنەرێ دهۆكێ: د نەخوشترین كاودان دا دەربازبووینە دووماهیا كۆپا كوردستانێ
ئەڤرۆ
تیما تەپا پێی یا یانەیا دهۆك دەربازبوو یاریا دووماهیا كۆپا كوردستانێ، پشتی سەركەفتنەكا مەزن ل سەر یانەیا شەقلاوە ئینایی ب چار گۆلان بەرانبەر گۆلەكێ، د یاریا واندا ئەوا ل ئێك شەمبیا بۆری ژ چارچووڤێ قۆناغا پێش دووماهیێ ئەوا ل یاریگەها یانەیا دهۆك هاتیە كرن، ژلایێ خوەڤە یانەیا پێشمەرگەیا هەولێر ژی گەهشتە یاریا دووماهیێ ب سەركەفتنا خوە ل سەر قەلادز ب چار گۆلێن پاقژ.
ل دۆر ڤێ یەكێ عەلی وەحیددین راهێنەرێ تیما یانەیا دهۆك بۆ رۆژناما ئەڤرۆ گۆت: دەستپێكێ دەستخووەشیا یاریزان و كارگێریا یانێ دكەم ژبەر كو مە ب گیانەكێ كۆم و ئێكگرتی كاروانێ تیما خوە د خول و كۆپا كوردستانێ دا بڕێڤەبرییە سەرباری ئەوان ئاستەنگێن مەزن و بێ بەهركرنا یاریزانێن تیما مە ژ مووچەیێ خوە ئەڤە بۆ ماوەیێ چار هەیڤە ژبەر لاوازیا داراییا یانێ، لێ رژدی و وەفاداریا سێ گۆشا تیمێ ژ كادرێ راهێنانێ، یاریزان و كارگێری بوو ئەگەر د نەخووشترین كاودان دا دەربازبینە یاریا دووماهیا كۆپا كوردستانێ و ئەڤە ژی دەستكەفتە بۆ پارێزگەهێ و جەماوەرێ یانێ.
هەروەسان ناڤهاتی گۆت: ئەم لڤێرە نا راوەستیێن بەلكو دێ ل یاریا دووماهیێ شەڕی بۆ دەستڤە ئینانا ناسناڤی كەین و ئەڤە ئارمانجا مە و كارگێریێ یە، مە دڤێت ئەم دەستكەفتەكێ نوو یێ ناسناڤی بۆ جەماوەرێ خوە ب كەینە دیاری پشتی ڤەقەتیانەكا درێژ، هەروەسان د خولا كوردستانێ ژی دا گەشبینیێ ددەمە هەموو جەماوەرێ یانێ د ئەڤ سالە دا مە جهێ خوە پاراستیە و بۆ وەرزێ بهێت دێ بشێوەكێ باشتر و بهێزتر و هەڤڕكی هێنە دناڤ خولێ دا.
