دهۆك و زاخۆ ب پشتگەرمیا جەماوەرێ خوە دێ بزاڤێن سەركەفتنێ كەن
ئەڤرۆ
قەیس وەیس:
دهێتە چاڤەڕێ كرن ل ئەینی و شەمبیا بهێت دەه یاریێن گەڕا 27ێ یا خولا پلا نایابا ئیراقێ یا تەپا پێی بهێنە ئەنجامدان، یانەیێن دهۆك و زاخۆ د ناڤ ئەرد و جەماوەرێ خوە دا دێ بزاڤێن سەركەفتنێ و قەرەبوویا خالان كەن، هەولێر ل بەغدا ب هیڤییە بەردەوامیێ بدەتە ئەنجامێن خوە یێن باش و نەورۆز دێ كەربەلا مێڤان كەت.
زاخۆ ب ستاڤەكێ نوو دێ كارەبا مێڤان كەت
بڕیارە ل ئەینیا بهێت تیما یانەیا زاخۆ دەمژمێر 6:15 یاریگەها خوە مێڤانداریا یانەیا كارەبا بكەت كو دێ بیتە تاقیكرنا ئێكێ یا راهێنەرێ نوو نزار مەحرووس ئەوێ ل جهێ راهێنەرێ بەرێ حەیدەر عەبدولئەمیر هاتیە دانان پشتی دەست ژ كارێ خوە بەردایی ژبەر ئەنجامێن لاواز د خولێ دا، كوڕێن خابووری د رەوشەكا خراب دانە و نەشیایە جەماوەرێ خوە دلخوەش بكەن تایبەت دگەل راهێنەرێ دەستكاركێشایی ئەوێ 22 یاری دگەل تیمێ بوویە هەشت خوسارەتی، نەه وەكهەڤی و پێنچ سەركەفتن هەنە، ب 27 خالان رێزا 16ێ دهێت كو ئەڤ رێزبەندیە بوویە جهێ نەرازیبوونا كارگێریێ و جەماوەری، لەوما ئەڤ یاریە دبیتە تاقیكرنا ئێكێ و بهێز بۆ كادرێ راهێنانێ بەرانبەر یانەیا كارەبا ئەوا دهێتە هژمارتن هەسپێ رەش یێ خولێ ئەوا ب 49 خالان رێزا چارێ دهێت و پێنچ خالان ژ خودانا سەرێ لیستێ كێمترە ئەو ژی یانەیا شورتە ئەوا 54 خال كۆمكرینە، لەوما یاری ب سانەهی نابیت بۆ زاخۆییان و دێ شەڕی بۆ سەركەفتنێ كەن، ژیاریێن دی یێن رۆژا ئەینی، نەورۆز دێ كەربەلا مێڤان كەت، نەفت ئەلوەسەت- زەورا، نەجەف- ئەلقاسم، شورتە و جەویە د كۆپێتكا یاریێن ڤێ حەفتیێ دانە
دهۆك پێدڤی ب جەماوەرێ خوە یە
ژلایێ خوەڤە یانەیا دهۆك ل رۆژا شەمبیا بهێت دەمژمێر چارێ ئێڤاری دێ ل یاریگەها خوە مێڤانداریا یانەیا نەفت ئەلبەسرا كەت، ئەلهۆیێن چیا پشتی د یاریا بۆری دا ب خالەگا گرنگ ژ جەویە وەرگرتی ل باژێرێ بەغدا گەشبینە دڤێ یاریێ دا ب زاخەكا بلند سێ خالێن دی ژی زێدەكەت ئەوا رێزبەندیا وێ یا نەهێ یە ب كۆمكرنا 37 خالان، مێڤانا وێ یا بەسرا 33 خال هەنە رێزا 14ێ دهێت، دهۆك پێدڤی ب جەماوەرێ خوە هەیە پشتی د یاریێن بۆری دا رێژەیا پشتەڤانان بەر ب كێمبوونێ ڤە چوویە، ژ یاریێن دی یێن رۆژا شەمبی، ، كەرخ- حدوود، سیناعە- نەفت میسان، دیوانیە تەلەبە، رۆژا ئێكشەمبی یانەیا هەولێر دێ بیتە مێڤانا نەفت.
