ل نێزیك دێ كەنالێ دهۆك یێ زارۆیان هێتە ڤەكرن
ئەڤرۆ
دیدار، سالار محەمەد دۆسكی:
رێڤەبەرێ كەنالێ دهۆك ئاشكرا كر، نوكە كارێ ل سەر ڤەكرنا كەنالێ دهۆك یێ زارۆكان دهێتەكرن، زێدەباری هندێ د پلان دایە كار ل سەر دروستكرنا دراما خومالی ل دەڤەرێ بهێتەكرن و گۆت: : كاری ل سەر ڤەكرنا تەلەڤزیونەكا زارۆكان دكەین و كار ل سەر پێشخستنا دهۆك سپۆرت دهێتەكرن و پلان و داخوازیا مە ل ژێدەرێن مە ئەوە كار ل سەر دروستكرنا دراما خومالی یا دەڤەرێ بكەین.
هەلكەفت عەبدولواحد، رێڤەبەرێ كەنالێ دهۆك، ب هەلكەفتا بورینا 31 سالان ل سەر دامەزراندنا وی كەنالی د دیدارەكێ دا بۆ رۆژناما ئەڤرۆ گۆت: ئەڤرۆ 3/5/2023 رۆژا دامەزراندنا ڤی كەنالی یە و 31 سال دەربازدبن، ئەڤە بیرەوەریا هێژا دبیردانكا خەلكێ پارێزگەها دهۆك دا و دیرۆكا میدیا كوردی دا رۆلەكێ مەزن هەبوویە، لەوما سالڤەگەرا دهۆك تیڤی یا گرنگە بۆ خەلكی، چونكە دەزگەهەكێ ب ڤی رەنگی خزمەتەكا مەزن بۆ كەلتور و چاندا كوردی كریە، بۆ ئەڤ سالە مە دڤێت پێشوازی یا رۆژنامەڤان و راگەهاندكار و بینەر و دوست و هەڤال و خەلكێ خوە بكەین و ئەڤە دێ د چارچووڤێ ئاڤاهی دا بیت هەر ئەڤرۆ 3/5/2023 ل دەمژمێر 10 هەتا 1ی نیڤرۆ ب تنێ رێورەسمێن پێشوازیێ دێ هەبن ب مەرەما پیرۆزباهیێ، ل دانێ ئێڤاری لدەمژێر 6 بۆ 7 بەرنامەكێ تایبەت دێ هەبیت كو گرێدایی سالا دامەزراندنێ و دەمژمێر 30 و 9 هەتا 11 رۆمالەكا راستەوخو دێ هەبیت و دیدار ل گەل بێژەر و كارمەندێن خزمەت كرین و ب چالاكیەكا هونەری دێ پرۆگرام ب دووماهی هێت.
هەلكەفت ئەو ژی دیاركر، نوكە ل تەلەڤزیونێ 15 پرۆگرامێن هەمەرەنگ هەنە و پرۆگرامێن رۆژانە و حەفتیانە و دو حەفتیا جارەكێ ژی هەنە، هندەك پرۆگرامێن مە د نووی نە و هندەك پرۆگرامێن نوی ژی دێ هەبن و رەنگە ڤێ هەیڤێ دەست پێ بكەن و گۆت: پشتی پێشكەفتنا تەكنولوژیایێ و تایبەت ئەنترنێتێ و ئامیرێن پێشكەفتی ل ڤی سەردەمی پەخشێ تەلەڤزیونا دهۆك ب رێكا 11 سیستەما بۆ بینەری دهێتە گەهاندن و نە ب تنێ ل دەڤەرا بەهدینان بەلكو ل سەرانسەری جیهانێ دگەهیت.
ناڤبری گۆت: راستە ژێدەرێ دهۆك تیڤی پارتی دیموكراتی كوردستانە، لێ هەردەم دهۆك تیڤی ب مێژوویا خوە بوویە ئامرازێ جێبەجێكرنا پرەنسیپێن رێبازا بارزانی، ئەو پرەنسیپێن مرۆڤ دوستی و ژیان دوستی و پێكڤە ژیان خزمەتا چاند و زمان و كەلتور و پەروەردەكرنا تاكی ل سەر بنەمایێن پەروەردەیی و نشتیمانی كریە، سازیەكا فەرهەنگی یا جڤاكی یا گشتی یە ل سەرانسەری دەڤەرێ دروست كریە بینەرێ دهۆك تیڤی نە ب تنێ كەسەك یان ژیەكە و حزبەكە پتر رەهەندەكێ نشتیمانی و جڤاكی ب خوە ڤەگرتیە.
رێڤەبەرێ دهۆك تیڤی گۆت ژی: كاری ل سەر ڤەكرنا تەلەڤزیونەكا زارۆكان دكەین و كار ل سەر پێشخستنا دهۆك سپۆرت دهێتەكرن و پلان و داخازیا مە ل ژێدەرێن مە ئەوە كار ل سەر دروستكرنا دراما خومالی یا دەڤەرێ بكەین، چونكە دێ وێ گەلەك كارتێكرنا خوە یا مەزن یا ئەرێنی ل سەر جڤاكێ مە هەبیت و تایبەت ڤێ قوناغێ و پێشكەفتنا تەكنولوژیایێ و هەكە پشتەڤانیا مە هاتەكرن دێ پشتەڤانیا دروستكرنا دراما خومالی كەین.
رێڤەبەرێ دهۆك ئەو ژی گۆت: ب شێوەكێ گشتی دهۆك تیڤی هەمی بزاڤا دكەت خوە ل گەل تەكنولوژیا سەردەمیانە و پێشكەفتنا ئەڤرۆ خوە ب گونجینیت، لەوما ژی هەمی بزاڤا دكەین وان پرۆگراما دروست بكەین روویێ ناڤەروك و تەكنیك و دەمی ڤە ل گەل جیهانا ئەڤرۆ ب گونجیت و زێدەتر دناڤا خەلكێ خوە بین و دەنگ و رەنگێ دەڤەرێ بین، وەك گەهاندنا پەیام بۆ دەستهەلاتێ و نیشادانا خزمەت گوزرایان وەك روویەكێ شارستانی و دیسا نیشادانا كەلتور و فەرهەنگ بن كو گرێدایی كوردەواریێ بیت، هەتا ئەو جۆرە پرۆگرام بن بینەرێ خوە هەبیت د چارچووڤێ ڤان پرۆگرامان دا مە پەیام و ناما خوە هەیە.
خویاژی كر، پرۆگرامێ گوندان بەرهەڤیێن باش بۆ هاتینەكرن كو پرۆگرامەكێ نوویە و ستافەك بۆ هاتیە دانان و دێ دەست پێ هێتەكرن و پرۆگرامێ بەریكانان دێ ڤەگەریت و خەلك پەیوەندیێ ب تەلەڤزیونێ بكەت و هەم مفاداربیت و هەم خوشیێ ژێ وەربگریت، پرۆگرامێن سیاسی مفا وەرگرتن ژ ئەنترنێتێ مە سكایب هەیە و گەلەك جاران مە مێهڤان ل دەرڤەی وەلاتی هەنە، بەرنامێ نوڤار یێ رۆژانە یە ژ ئێك شەمبی هەتا پێنچ شەمبی و رۆژانە دو تەوەر ل گەل مێهڤانان دهێنە گەنگەشەكرن و هەمی گرێدایی رەوشەنبیریا گشتی و پەروەردەیی و جڤاكی، پرۆگرامەكێ هونەری دێ مە هەبیت بۆ هەر دو حەفتیان جارەكێ پتریا هونەرمەندێن دەڤەرێ دێ خوە تێدا بینن، پرۆگرامێ بیردانك ئەو كەسایەتی و خودان بەرهەم و خودان ئەزموون و پرۆگرامێ پێشمەرگە و خزمەتا پێشمەرگەی دهێتە بەرچافكرن، پرۆگرامێن شەهید دێ بەردەوام بیت بۆ خزمەتكرنا مالبالتێن شەهیدان.
هەلكەفت هێشتا ژی گۆت: ل گەل دەستبكاربوونا مە، پشكا شوشال میدیایێ مە ڤەكریە و چەندین گەنج كار ل سەر دكەن، سپێدێ هەتا ب شەڤ و هەمی پلاتفورم ل تەلەڤزیونێ دخزمەتێ دا وەك بەرهەمێ تەلەڤزیونێ كو بەلاف دكەن یان خوە گونجاندن بیت ل گەل لەزاتیێ و هەر روودانەكا ل دەڤەرێ دروست بیت ئێكسەر ل شوشال میدیایێ دا زانیاری دهێنە بەلاڤەكرن، تەلەڤزیون نە كەنالەكێ نووچەی یە، بەلكو كەنالەكێ گشتی یە، لێ قەرەبووكرن ل شوشال میدیایێ دهێتەكرن و نوونەراتیا دهۆك تیڤی دكەت و زووتر پەیام دگەهیتە بینەری.
رێڤەبەرێ دهۆك تیڤی ڤە ئەو ژی گۆت: ژ روویێ دەنگ و باسا پلانەكا باش هاتیە دارێتن و ب هەلكەفتا سالا نوو ڤێ مزگینیێ ددەینە بینەری دێ مە كورتیەك هەبیت ل دەمژمێر حەفت و دێ مە گەشتەكا دەنگ و باسێن نافخوە هەبیت ل دەمژمێر هەشت و هەر روودانەكا نافخو هەبیت دێ بەلاڤ بیت و دێ پتر پشتبەستنا مەل ل سەر روودانێن خومالی بیت و مێهڤان دهێنە ستودیویێ و دێ پەیامنێر ئێكسەر پشكداربن و دەمژمێر 9 دێ مە درێژی هەبیت و بەحسێ جیهانێ و عیراقێ و كوردستانێ و پارێزگەها دهۆك هێتەكرن.
هێشتا گۆت: مە تۆرەكا پەیامنێران هەنە،ل سەنتەرێ قەزایێ پێنچ پەیامنێر، بۆ هەر قەزایەكێ پەیامنێرەك دێ مە هەبیت، ب گشتی مە دێ 10 پەیامنێر هەبن و ئەڤە بەردەوام دێ د خزمەتا بینەرێ دهۆك تیڤی دابن بۆ گەشتێن دەنگ و باسا و دیسا كونتاكەكا باش دێ ل گەل شوشال میدیا دهۆك تیڤی دێ هەبیت بۆ هەر روودانەكا نەخوازراو ئێكسەر دێ خوە گونجینن ل گەل لەزاتیێ و هەر ئێكسەر ئەو روودان ب شێوازێ لایف ل ئەكاونتێ فەیسبووكا دهۆك تیڤی دهێتە بەلاڤەكرن.
ل دووماهیێ گۆت: ب شێوەكێ گشتی ب پشتەڤانیا بارەگایێ بارزانی و بەشێ رەوشەنبیری و راگەهاندنێ ناڤەندا خانی، ئەو گوهورینێن تەلەڤزیونێ هاتینەكرن، ئەو پلان و بەرنامێن هاتینە دانان و ئەو ستافێ دلسۆزێ نوكە د كاری دا نیشانێن وێ چەندێ نە كو دهۆك تیڤی دێ بەرەف قوناغێن باشتر چیت، من پەیامەك بۆ بینەرێ دهۆك هەیە كو ئەڤە تەلەڤزیونا دایكە، خزمەتەكا مەزن یا زمان و چاند و كەلتورێ دەڤەرا بەهدینان كریە و نفش ل بەر دهۆك تیڤی هاتینە پەروەردەكرن و مێژوویەكا كەڤنار هەیە بوویە رەمزەك بۆ میدیا كوردی و پارێزگەها دهۆك، لەوما هیڤی دكەین ئەو حەز و ڤیانا وان بۆ مە یا بەردەوام بیت و هەر بینەرێن مە بن دێ بەردەوام خزمەتا واكەین بلا تەماشە ڤان و بینتەرێن مە بن و دهۆك تیڤی پێ گوهورێ خوە نینە دناڤ بیردانكا پارێزگەها دهۆك جهێ خوە كریە دڤێت ئەم ب پارێزین.
