یاریا ئەڤرۆ جەنگا ئێكێ یە بۆ ناسناڤێ چامپیۆنزێ
جەماوەرێ وەرزشی تایبەت یێ یاریا تەپا پێی ب ژڤانە بۆ دیدارەكا ئاگرین یا ب تاما تۆلڤەكرنێ و دۆپاتكرنا سەركەفتنێ كود بیتە شەرێ ئێكێ بۆ ناسناڤی ئەوا بڕیارە ئەڤرۆ ل دەمژمێر 11ێ شەڤ یانەیا ریال مەدرید قارەمانا وەرزێ بۆری ل یاریگەها خوە سانتیاگۆ بیرنابیۆ مێڤانداریا یانەیا مانچستەر ستی یا ئنگلتەرایی بكەت ژ چارچووڤێ یاریا ئێكێ یا قۆناغا پێش دووماهیا چامپیۆنز لیگ.
مان ستی پلان بۆ دربەكێ كۆژەك دانایە
یانەیا ئنگلتەرا ب سەركێشیا راهێنەرێ مانچستەر ستی یێ ئسپانی پێب گۆاردیۆلایی دیار كر ئەوی هندەك پلانێن تایبەت هەنە كو بشێت دناڤ یاریگەها سانتیاگۆ دا دربەكێ كۆژەك ب دانیت بەری دیدارا دویێ یا ڤەبڕ بۆ یارییا دووماهیێ، لێ هۆژداری ژی دایە یاریزانێن خوە كو ریال مەدرید د ناڤ ئەردێ خوە دا ب زەحمەت تووشی دۆراندنێ ببیت و ئاشكەرا كر ئەوان هەموو لایەنێن هێز و كێماسیا تیما وان خاندیە.
ریال دێ بزاڤێن ڤەگەڕاندنا سیناریۆیا وەرزێ بۆری كەت
یانا ریال مەدرید بەرانبەری مەزنترین ئاستەنگ ژبۆ ب جهئینانا خەونا خوە یا ناسناڤێ 15ێ، هەرچەندە ل وەرزێ بۆری شیابوو د هەمان سیناریۆیا قۆناغا پێش دووماهی دا ل سەر كیستێ وێ دەربازبیتە یاریا دووماهیێ، د یاریا ئێكێ دا ئەوا ل ئنگلتەرا هاتیە كرن مان ستی شیابوو 4-3 سەركەفتنێ بینت، لێ یاریا دویێ ریالێ شیا دناڤ یاریگەها خوە دا 3-1 سەركەفتنێ بینت پشتی دەمێ زێدەكری و ب ئەنجامێ 6-5 دەربازبیتە یاریا دووماهیێ و ل سەر كیستێ لیڤەرپۆل ب گۆلەكێ بێ بەرانبەر ناسناڤێ خوە یی 14ێ ب دەستڤە بینت، بۆ یاریا ئەڤ شەڤە وەكو یا سالا بۆری نابیت ژبەركو هێزا یانەیا ئنكلتەرایێ باشتر بوویە و بەربژارەكا بهێزە بۆ ناسناڤی، دیرووكا یاریێن چامپیۆنزێ دا نەه جاران بەرانبەری ئێك بووینە ریال چار سەركەفتن بەرانبەر سێ سەركەفتن بۆ مان ستی و هەردو یانە دو وەكهەڤی ئیناینە، یانەیا مان ستی ئەوا ب سالان خەونا بۆ یاریا دووماهیێ و چامپیۆنزێ دبینیت دێ بزاڤێن دەستڤەئینانا سەركەفتنێ كەت بەری دیدارا دویێ ل ئنگلتەرا و بەرانبەر دا ریال دێ دناڤ جەماوەرێ خوە دا یاریا مرنێ كەت بۆ سەركەفتنێ بەری یاریا دویێ و یا ڤەبر ئەوا دێ پلێتا یاریا دووماهیێ ئێكلاكەت.
پێكهاتیێ پێشبینیكری
رۆژناما ئاس یا ئسپانی پێكهاتیێ پێشبینیكری یێ ریال مەدرید دیار كر ئەوا راهێنەر كارلۆ ئەنشلۆتی راگەهاندی ب4-3-3 كو پێكهاتیە ژ گۆلپارێز تیپۆ كورتۆا، هێلا بەرەڤانیێ دانی كارباخال، ئیدیر میلیتاۆ، ئەنتۆنیۆ رۆدرێگێز، دڤێت ئالابا، هێلا ناڤین، تۆنی كرۆس، لۆكا مۆدرێچ، ئێدوارد كاماڤینگا، هێلا هێرشبرنێ كەریم بنزێما، ڤینیسیۆس جۆنیرۆ و ڤالڤێردی.
ژلایێ خوەڤە پێكهاتیێ پێشبینیكری یێ گۆاردیۆلایی یێ 3-4-3 بڤی رەنگی یە گۆلپارێز ئیدرسۆن، هێلا بەرەڤانیێ رۆبن دیاز، مانوێل ئاكانچی، سێرجیۆ گۆمێز، هێلا ناڤین، ئیلكایی گۆندۆگان، جۆن ستۆنز، رۆدری، كیڤین دی برۆین، هێلا هێرشبرنێ، جاك چریلیچ، ئیرلینگ هالاند و برناردۆ سێلڤا.
بۆ زانین دادڤانێ پۆرتۆگالی ئارتۆر سۆارێس دیاز دێ وەكو دادڤانێ ئێكێ دێ یاریێ برێڤە بەت.
