سالح كەكۆ: ژبەر نەبوونا پشتەڤانیێ دێ ژ مەزنترین قارەمانی بێ بەهربین
راهێنەرێ تیما كیك بۆكسینگا یانەیا دهۆك دیار كر هەتا نوكە چو لایەن بەرهەڤ نەبووینە پشتەڤانیا تیما مە بكەن ژ لایێ ماددی ڤە بكەت ئەوا خوە بەرهەڤ دكەت بۆ قارەمانیا نێڤدەولەتی ئێك ژ مەزنترین قارەمانیێن جیهانی كو بڕیارە هەڤڕكیێن وێ ل 26ێ ڤێ هەیڤێ وەلاتێ ئۆردن بهێتە كرن و هیڤی خواست پارێزگارێ دهۆكێ دووڤچوون و پشتەڤانیێ بكەت.
د داخویانیەكێ دا سالح كەكۆ بۆ رۆژناما ئەڤرۆ گۆت: پشتی داخوازنامەیا فەرمی ژلایێ ئێكەتیا عەرەبی و جیهانی WAKO وەكو یانەیا ئێكانە ل كوردستانێ و پەسەندكری بۆ یاریا كیك بۆكسینگێ هاتیە ب خوەشخالی ڤە دبێژین ئەڤ پێتگاڤە بەلگەیە بۆ باوەرپێكرنا ئێكەتیێن جیهانی و عەرەبی ب شیانێن یاریزانێن پارێزگەها دهۆكێ، لەوما بۆ ڤێ قارەمانیێ ژی پشت گەرمی ب یاریزانێن خودان شیان مە هەنە و بەرهەڤن ل سەر ئاستێ كوڕان و كچان، لێ ژبەر كو كاودانێن یانەیا دهۆك ژلایێ دارایی ڤە د لاوازن د شیان دا نینە پشتەڤانیا مە بكەن، ئەڤەژی دێ دڕبەك ب گەنجێن پارێزگەهێ و یاریزانان كەڤیت و دێ بێ بەرهربن ژ مەزنترین قارەمانی ئەوا دهێتە پێشبینیكرن باشترین یاریزانێن جیهانی و پیشەكار ل وەلاتێن ئۆرۆپا و ئەفریقیا پشكداریێ بكەن.
ناڤهاتی گازیا خوە دگەینتە پارێزگارێ دهۆكێ و جهێن پەیوەندیدار و گۆت: هیڤییا مە ئەوە ژ یانەیێ و پارێزگارێ دهۆكێ د. عەلی تەتەر پشتەڤانیا تیما مە بكەن بۆ ڤێ روودانا مەزن و یاریزانێن دهۆكێ پێدڤی ب ئەڤان جورە قارەمانیێن مەزنن و نەهێلن بێ بەهربن، پێنەڤێت ب شانازیڤە وەكو یانەكا كوردستانێ دێ پشكداربین و ئالایێ كوردستانێ ژی بلند كەین.
