ئەڤرۆ شەرێ دهۆك و زاخۆ یێ دووماهیێ یە بۆ مانێ د خولێ دا
بڕیارە ئەڤرۆ پەردە ل سەر وەرزێ 2022- 2023 یێ خولا پلا نایابا كوردستانێ یا تەپا پێی بهێتە دانان ب ئەنجامدانا حەفت یاری ژ هەڤڕكیێن گەڕا 30ێ و دووماهیێ ئەوێن دێ ل دەمژمێر چاری ئێڤاری هێنە كرن، هەردو یانەیێن دهۆك و زاخۆ دێ شەرێ مانا خوە و مسۆگەركرنێ د خولێ دا كەن، یانەیا ئاكرێ بێ گڤاشتن دێ یاریا خوە ل باژێرێ سلێمانیێ ئەنجامدەت.
دهۆك پێدڤی ب خالەكێ یە
بڕیارە ئەڤرۆ تیما یانەیا دهۆك ل یاریگەها خوە مێڤانداریا یانەیا سۆران بكەت، ئەلهۆیێن چیا ل رێزا 13ێ ب32 خالان دهێن، بەرانبەر دا یانەیا سۆرانە 39 خال كۆمكرینە و رێزا سێیێ دهێت، ژبۆ مسۆگەركرنا مانا خوە د پلا نایاب دا و خوە دووركرن ژ یاریێن چارەنڤیس دگەل یانەیەكا پلا ئێك ب تنێ پێدڤی ب ئێك خال هەیە، لێ راهێنەرێ تیمێ عەلی وەحیددین بۆ رۆژناما ئەڤرۆ دیار كر دێ ب هەموو شیانێن خوە یاریێ كەن و هزرا وان خالەك نابیت بەلكو بۆ سەركەفتنێ بیت و گۆت: سەرباری دو یاریزانێن مە ناكەت ژبەر هنگافتن و كارتێن زەر لێ باوەریەكا تەمام ب هەموو یاریزان هەیە و رژدین بۆ سەركەفتنێ.
بتنێ سەركەفتن دێ زاخۆ ژ داكەفتنا ئێكسەر قۆرتالكەت
ژلایێ خوەڤە تیما زاخۆ دێ ل باژێرێ سلێمانیێ بیتە مێڤانا یانەیا دەربەندیخان د یاریەكا چارەنڤیس بۆ كوڕێن خابووری ئەوێن نوكە ب29 خالان ل رێزا 15ێ و دووماهیێ دهێن، ژلایێ خوەڤە چ ئەنجام كارتیكرنێ ل سەر خودانێن ئەردی ناكەت بۆ داكەفتنێ ئەوا ب 33 خالان رێزا 10ێ دهێت، لێ بۆ كوڕێن خابووری چو بژاردە نینن ژبلی سێ خالان پێخەمەت خوە قۆرتالكرنا ئێكسەر ژ داكەفتنێ بۆ پلا ئێك، ل دووڤ پێزانینان كادرێ راهێنانێ ب كۆمەكا باش یا یاریزانێن تیما خولا ئیراقێ بەرهەڤكرینە بۆ تیما خوە پێخەمەت سەركەفتن.
سیناریویا نە پێشبینیكری
ل دووڤ رێزبەندیا خولێ هەلوەستێ دهۆكێ ژ یێ زاخۆ باشترە لێ ژبەر كو یانەیا چەمچەمال خودانا 31 خالایە رێزا 14ێ و بەری دووماهیێ دهێت و ئەوێ یاری نە ماینە، هەكە هەردو یانەیێن بەهدینان سەركەفتن ئینان، تیما زاخۆ دێ بەرانبەر تیما سێیێ یا پلا ئێك بیت بۆ ئێكلاكرنا پلێتا نایاب، لێ خوسارەتی یان وەكهەڤیا زاخۆ ئێكسەر بۆ پلا ئێك پاشڤە چیت، بەرانبەر دا هەكە دهۆك خوسارەت بوو و زاخۆ سەركەفت وی دەمی دهۆك دێ بەرانبەر تیما پلا ئێك یاریێ كەت، ژلایێ خوەڤە یانەیا سیرۆانی نوو ئەوا 32 خا كۆمكرین هەكە خوسارەت بوو دبیت ئەو ژی لبن مەترسیا یاریا ڤەبڕ بیت دگەل تیما خولا پلا ئێك بیت.
ئاكرێ بێ گڤاشتن دێ یاریا خوە كەت
تیما ئاكرێ نوونەرا سێیێ یا بەهدینان و پارێزگەهێ ل باژێرێ سلێمانیێ دێ بیتە مێڤانا سەید سادق د یاریەكا بێ گڤاشتن و ئەنجامێ وی ژی نە یا چارەنڤیسە، ژبەر كو ئاكرێ 33 خال كۆمكرینە و رێزا 11 دهێت، خودانێن ئەردی ب35 خالان رێزا هەشتێ دهێت.
پێشمەرگە دێ ئاهنگا ناسناڤی گێریت
یانەیا پێشمەرگەیا هەولێری ئەوا بەری ڤێ یاریێ ناسناڤێ خولێ مسۆگەر كری دێ د ناڤ یاریگەها خوە دا ب ئاهنگا دەستڤە ئینانا ناسناڤی مێڤانداریا یانەیا چوارقورنە كەت، ژ یاریێن دی یێن ئەڤرۆ، سیروانی نوو- شێروانە، ئارارات- شەقلاوە، هندرین- برایەتی.
