زاخۆ و حەشدا شەعبی دێ بزاڤێن دەستڤەئینانا رێزا سێیێ كەن
دهێتە چاڤەڕێ كرن ئەڤرۆ تیما باسكێت بۆلا یانەیا زاخۆ نوونەرا ئێكانە یا كوردستانێ د خولا پلا نایابا ئیراقێ دا یاریەكا دیرۆكی بەرانبەر یانەیا حەشدا شەعبی یا بەغدایی ب جەنگیت ژبۆ ب دەستڤە ئینانا سەركەفتنێ و رێزا سێیێ، ئەوا بڕیارە ل دەمژمێر شەشێ ئێڤاریەكا درنەگ ل هۆلا گرتیا شەعب ل پایتەختێ ئیراقێ بهێتە كرن.
ل دۆر دووماهی بەرهەڤیێن تیما زاخۆ جوتیار عەلی هاریكارێ راهێنەرێ زاخۆ بۆ رۆژناما ئەڤرۆ گۆت: پشتی ژ دەستدانا پلێتا یاریا دووماهیێ ئەم یێن قۆناغەكا دی دا ئەو ژی ناهێلین رێزا سێیێ ژی ژ دەست بدەین، لەوما بەرهەڤیێن باش هاتینە كرن و هەمی یاریزان رژدن قەرەبوویا یاریا دووماهیێ ب دەستڤە ئینانا رێزا سێیێ بكەن، هەرچەندە تیما حەشد ژی یا بهێزە و خودان یاریزانێن شیانین و ئەوان ژی ئۆمێدێن مەزن هەنە بۆ رێزا سێیێ، وەكو كادرێ راهێنانێ مە خواندنا هەمی لایەنێن تیما حەشدێ كریە.
ژلایەكێ دووڤە ناڤهاتی ئەوچەندە ژی گۆت: ئەو ئەنجامێن وەرزێ ئەڤ سالە د خولا ئیراقێ دا هاتیە پێش بۆ جارا ئێكێ یە و بەلگەیە ل سەر هێزا یانەیا زاخۆ د خولێ دا و هەبوونا جەماوەرەكێ دلسۆز و كارگێریا پشتەڤان خالێن سەركەفتنێ نە، ب هیڤینە رێزا سێیێ ب دەستڤە بینن و ببیتە دەستپێكا دەستكەفتان.
بۆ زانین تیما زاخۆ دەربازبوو قۆناغا پلەیی ئۆڤ پشتی ل رێزا چارێ هاتی ب كۆمكرنا 39 خال زێدەباری خالەكا تیما تازەپێگەهشتیان، د قۆناغا پلەیی ئۆڤ دا وەكو هەڤڕكەكا بهێز بەرانبەر یانەیا نەفت راوەستیا و شیایی سێ سەركەفتنان بینت و وەكهەڤی بیت لێ د یاریا حەفتێ و ڤەبڕ دا بتنێ جوداهیا دو خالان خوسارەت بیت ب74-72 خالان، د یاریا واندا ئەوا ل بەغدا هاتیە كرن.
بڕیارە هەردو یانەیێن شورتە و نەفت چار یارییان ژ چارچووڤێ پلەی ئۆڤ بكەن ژبۆ دیاركرنا قارەمانێ خولێ، ئەڤرۆ دەمژمێر8:30 شەڤ یاریەكێ كەن.
