بڕیارێن توند دژی یانەیا دینارتە هاتنە دەركرن
قەیس وەیس:
دوهی د كۆمبوونەكا ئاسایی دا ئێكەتیا تەپا پێی یا كوردستانێ چەند بڕیار و رێنما پەسەندكرن ژوانا دوورئێخستنا تیما تەپا پێی یا یانەیا دینارتە بۆ وەرزێ ئەڤ سالە ژ خولا پلا دو، دیسان چار یاریزان و دو ئەندامێن دەستەكا گشتی هاتنە دووركرن هەتا هەتایی د چالاكیێن ئێكەتیا تەپا پێی دا.
د داخویانیەكێ دا ئازاد ئەحمەد ئەندامێ ئێكەتیا تەپا پێی یا كوردستانێ بۆ رۆژناما ئەڤرۆ گۆت: ل دووڤ راپۆرتا سەرپەرشتێ یاریێ و دیتنا ئەوان گرتە ڤیدیۆیێن روودانێن یاریا دناڤبەرا دینارتە و شێخان ژ خولا پلا دو كو تێدا دیاربوویی ب شێوەكێ تۆند ژلایێ چەند یاریزان و دەستەكا كارگێریێ هێرش ل دادڤانێن یاریێ دهێنە كرن تایبەت دادڤانێ نیڤێ، ئەڤچەندە بوویە جهێ نەرازیبوونا مە و جادا وەرزشی و خالەكا كرێت و رەوشتەكێ دوور ژ وەرزشێ و دەڤەرێ، لەوما وەكو ئێكەتیا تەپا پێی مە كۆمبوونا خوە كر و لدووڤ یاسا و رێنما سەردەردەری دگەل ئەوێ روودانێ كریە.
هەروەسان ناڤهاتی گۆت: بڕیار هاتە دان دوورئێخستنا تیما یانەیا دینارتە ژ هەڤڕكیێن ئەڤ سالە یێ خولا پلا دو، دوورئێخستنا هەتا هەتایی بۆ چار یاریزانێن تۆندۆتیژی دژی دادڤانان كرین، دیسان دو ئەندامێن كارگێریێ ژبەركو دەست د ڤێ روودانێ دا هەبوون ئەوژی هاتنە سزادا كو د چو چالاكیێن ئێكەتیا تەپا پێی دا ئامادەنابن و بابەتێ وان بوو رێڤەبەریا گشتی یا وەرزشی ل هەرێما كوردستانێ هاتیە هنارتن پێخەمەت پێرابوونێن كارگێری دیسان كۆژمێ ملیۆن دینار وەكو سزا هاتیە دەستنیشانكرن، ئەڤا روودایی ب هیچ رەنگەكی نا هێتە قەبولكرن و دێ ب تۆندی بەرانبەر هەر كەسەكێ تۆندۆتیژیێ بكەت راوەستیێن.
