بزاڤ بۆ ڤەگەڕاندنا مافێن وەرزشا پارێزگەها دهۆكێ دهێنە كرن
ئەڤرۆ
د داخویانیەكێ دا سەرۆكێ نوونەراتیا دهۆك یا لژنا ئۆلمپیا كوردستانێ دیار كر پشتی كۆمبوونەكا تایبەت یا بەرپرسێن وەرزشا پارێزگەهێ دگەل رێڤەبەرێ وەرزشی و رێڤەبەرێ چالاكیێن وەرزشی ل پەروەردەیا گشتی یا پارێزگەهێ و سەرۆك یانە و ئێكەتیا تەپا پێی یا پارێزگەهێ ل سەر ڤەگەڕاندنا مافێ وەرزشا پارێزگەها دهۆكێ د لژنا ئۆلمپیی و ئێكەتیا تەپا پێی یا كوردستانێ دا یا گرێدایی ب زێدەكرنا نوونەرێن پارێزگەهێ و هەلوەستەكێ ئێگكرتی هاتیە بەرهەڤكرن بۆ ڤێ پێنگاڤێ.
زێدەتر د. ئەحمەد قاسم بۆ رۆژناما ئەڤرۆ گۆت: د كۆمبوونێ دا بەحس ل سەر چەند تەوەران هاتبوو كرن ژوانا ئەوان روودانێن ل یاریگەها شەهید فرانسۆ حەریری هاتینە دیتن د دەمێ یاریا تیما دهۆك و پێشمەرگەیا هەولێرێ ژ كۆپا كوردستانێ، سەرباری ئەو توندوتیژیا دناڤ یاریگەهێ دا چێبوو، سەرەدەریەكا خراب ل سەر جەماوەرێ دهۆكێ هاتە كرن تایبەت هێزێن ئێمناهیێ ئەوێن غازا رۆندك رێژ دژی جەماوەری ب كارئیناین و دیسان پشتی برینداربوونا وان ژی چ بەرپرسێن حوكمی و وەرزشی د هەوارا وان نەچوون.
هەروەسان ناڤهاتی گۆت: چەندین جاران مە داخواز دكر نوونەرێن پارێزگەهێ د لژنا ئۆلمپێ و ئێكەتیا تەپا پیی یا كوردستانێ زێدەبكەن وەكو مافەكێ رەوا یێ پارێزگەها دهۆكێ، ئەڤچارە ژی دێ ب رژدی ل سەر كار كەین و مە هەلوەستەكێ ئێگكرتی بەرهەڤكریە و داخواز ژ پارێزگارێ دهۆكێ د. عەلی تەتەری دكەین پشتەڤانیا مە بكەت ژبۆ وەرگرتنا مافێن وەرزشا پارێزگەهێ ل دەزگەهێن مەزن یێن كوردستانێ، نە بەرعاقلە پارێزگەها دهۆكێ نێزیكی 17 یانە هەبن ژوانا 14 یانە پشكداری خولان دبن بتنێ ئێك نوونەر د ئێكەتیا تەپا پێی یا كوردستانێ داهەبیت، بەرانبەر وێ ل پارێزگەهەكا دی چو یانە د خولان دا نەبن و نوونەرێن وان ئەندامبن، هەروەسان د لژنا ئۆلمپی ژی دا بتنێ مە ئێك ئەندام هەیە و وەكو ماف دڤێت دو هەتا سێ ئەندام هەبن، لەوما ئەم دێ داخوازیا خوە بۆ جهێن بلند فرێكەین و داخوازا مافێن وەرزشا پارێزگەها دهۆكێ كەین.
