دێربیێ پارێزگەهێ و زاكێری باشترینێن گەڕا 30ێ بوون
قەیس وەیس:
پشتی ب دووماهی هاتنا یاریێن گەڕا 30ێ یا حەفتیا بۆری ژ خولا ئیراقێ بۆ یانەیێن پلا نایابا تەپا پێی چەند ئامارێن نوو و باشترین هاتنە راگەهاندن، گرنگترین ئەوان ئاماران دێربیێ پارێزگەها دهۆكێ و دەستنیشانكرنا پیشەكارێ یانەیا دهۆك یانیك زاكێری و بەرهەڤبوون و پشتەڤانیا شارستانی یا جەماوەریێن دهۆك و زاخۆ بۆ یاریێ.
دەزگەهێن راگەهاندنێ و ئێكەتیا تەپا پێی یا ئیراقێ گرنگیەكا تایبەت بۆ یاریا دهۆك و زاخۆ دانابوو، ژبەركو دهێتە هژمارتن ئێك ژ دێربیێن ئاگرین و ب هێز و دیسان دهاتە زانین پشتی یاریێ ئالۆزی و توندوتیژی پەیدابوو، لێ ئەوا بوویە بەرۆڤاژی پێشبینیێن دەزگەهێن راگەهاندنا ئیراقێ، بەرهەڤبوونا هژمارەكا مەزن یا جەماوەرێ هەردو یانەیان د ناڤ یاریگەها دهۆكێ دا و جوانترین شێوە پشتەڤانیا تیمێن خوە دكرن هەتا یاری ب دووماهی هاتی بێ چو ئاریشە، لەوما دەزگەهێن راگەهاندنێ یاریا دێربیێ پارێزگەهێ وەكو باشترین یاری و جەماوەر هەلبژارت، ژلایەكێ دووڤە باشترین یاریزانێ پیشەكار یێ یانەیا دهۆكێ یانیك زاكێری هاتە دەستنیشانكرن، ژبەر ئاستێ وی و دیسان پشتی ب خەلەتی ڤە گۆل ل سەر تیما خوە كری ڤەگەڕیا گۆلا وەكهەڤیێ بۆ تیما خوە ئینا.
رێزبەندیا یانەیان د خولێ دا
ب دووماهی هاتنا یاریێن ڤێ گەڕی شەڕێ سەرێ لیستا خولێ و ناسناڤێ وەرزێ ئەڤ سالە دناڤبەرا سێ یانەیێن جەماوەری بەردەوامە، جەویە ب 62 خالان سەرێ لیستێ یە، شورتە ب61 خالان، زەورا ب57خالان، كارەبا51خالان و تەلەبە ب50 خالان رێزێن سێیێ هەتا پێنجێ دهێن، تیما یانەیا دهۆك جهێ خوە ل رێزا شەشێ ب45خالان پاراست لێ د مەترسیا ژ دەستدانێ دایە، ژبەركو هەرسێ یانەیێن نەفت ئەلمیسان، كەرخ و نەجەف ب 42 خالان رێزێن حەفت هەتا نەهێ دهێن، كەربەلا ب41خال، حدود41خال، هەولێر 39خال، نەوروز 38 خال، نەفت ئەلبەسرا ب36 خالان رێزێن 10ێ هەتا 14ێ دهێن، تیما یانەیا زاخۆ هێشتا لبن گەڤێن رێزێن دووماهیێ و داكەفتنێ دا یە ئەوا ب 33خالان رێزا 15ێ دهێت، نەفت ئەلوەسەت ب33خالان، ئەلقاسم29خال، نەفت27خال، سیناعە23خال و دیوانیە ب نەه خالان رێزێن 16 هەتا 20 و دووماهیێ دهێن.
یاریێن حەفتییا 31ێ یێن یانەیێن كوردستانی بڤی رەنگی نە، دووشەمبیێ نەوروز- دهۆك دەمژمێر 4:45 ئێڤاری ل باژێرێ سلێمانیێ، رۆژا سێ شەمبیێ زاخۆ دێ بهێزترین یاری مێڤانداریا شورتە كەت دەمژمێر حەفت شەڤ، هەروەسان هەولێر ژی بهێزترین یاری دەمژمێر 9:30 مێڤانداریا یانەیا جەویە كەت.
