مەرجێن هەرێمێ ژ بۆ ئینانا ژنا دویێ د توندن
ئەڤرۆ
بێور حەمدی:
پارێزەرەكی دیار كر كو د قانوونا عیراقێ دا ژ بو ئینانا هەڤژینا دویێ مەرجێن كێم هەنە، بەلێ ل هەرێما كوردستانێ مەرجێن توند هەنە و گۆت: ئەڤجا دڤێت ئەڤ قانوونە بهێنە هەموار كرن و هندەك گوهۆڕین سەردا بهێن.
پارێزەر عەبدولماجد عەبدولعەزیز د دیدارەكێ دا بو ڕوژناما ئەڤرۆ دیار كر كو ل گوڕەی قانوونا بارێ كەسی یا عیراقێ یا ژمارە 188 یا سالا 1959 هەتا كو دادوەر دەرفەتێ ب ئینانا ژنا دویێ بدەت دڤێت ئەڤ مەرجە هەبن (شیانێن دارایی و خودانكرنێ هەبن، یان هەڤژینا ئێكێ یا نەزوك بیت ئان نەخوشیەكا دوم درێژ هەبیت و زەلام نەشیا بچیتە نڤینا وێ).
عەبدولماجد گۆت: (بەلێ قانوونا هەرێمێ یا سالا 2008 یا پەرلەمانی هندەك ژ مەرجێن فڕەژنیێ گوهاڕتن ژ وان ژی، ڕازیبونا هەڤژینا ئێكێ، یان ڕاپورتەكا پزیشكی هەبیت كو ڤێ ژنێ نەخوشیەكا دوم درێژ هەیە یان یا نەزوكە و شیانێن دارایی یێن زەلامی د باشبن).
پارێزەری ئەو چەندە ژی دیار كر، دڤێت زەلام سوزنامەیەكێ پێشكێش بكەت كو دێ شێت دادپەروەری و یەكسانیێ دناڤبەرا هەردو هەڤژینان دا كەت و هەر كەسێ پێگیریێ ب ڤان مەرجان نەكەت سزایێ وی زیندانە كو ژ 6 هەیڤا هەتا سالەكێ یە و دێ هێتە غرامە كرن ب 10 ملیون دینارا و گۆت: (لێ بدیتنامن ئەڤ مەرجە گەلەك د توندن و پێدڤیە بهێنە هەموار كرن)
عەبدولماجدی دا زانین ژی كو ل گوڕەی قانوونا عیراقێ ڕازیبوونا هەڤژینا ئێكێ نەمەرجە، بتنێ هەكە دادوەر بزانیت كو مەرجێن دی هەموو دروستن و د ڕێگە پێداینە دێ دەستویریا هەڤژینا دویێ دەتێ، بەلێ لدووڤ قانوونا هەرێمێ ڕازیبونا هەڤژینا ئێكێ مەرجە و هەكە هەڤژینا ئێكێ یا ڕازی نەبوو ل وی دەمی دادوەر ژی ڕێكێ ب ئینانا هەڤژینا دویێ نادەت).
پارێزەر عەبدولماجد عەبدولعەزیز د بەردەوامیا ئاخفتنێن خودا گۆت: (هەكە هەڤژینا ئێكێ خیانەتا هەڤژینیێ ژی كربیت، ئەڤە نابیتە دەرفەت كو زەلامێ وێ ژنەكا دی بینیت، د ڤی حالەتی دا بتنێ وی ماف یێ هەی داخوازا جودابوونێ بكەت ل سەر بنەمایێ زیانێ و ناكوكیان، ئەڤە ژی لدووڤ قانوونێ یا ڕێكخستیە و پشتی هینگێ ئەو دشێت ژنەكا دی بینیت).
پارێزەری زێدەتر گۆت: (ب دیتنا من د هندەك حالەتان دا ئینانا ژنا دویێ كارەكێ پێدڤیە، بتایبەت لدووڤ وان مەرجێن مە بەحس ژێ كرین و گەلەك جاران هەڤژینا ئێكێ بخو حەز دكەت كو زەلامێ وێ هەڤژینەكا دی بینیت، لەورا پێدڤیە مەرج ب ساناهیتر بن، چونكی ئەو مەرجێن قانوونا هەرێمێ داناین گەلەك د توندن، هەكە نە دێ خەلك ب هندەك ڕێكێن دی چنە ڤی بابەتی و دێ قەستا دادگەهێن دەرڤەی هەرێمێ كەن).
