بارەگایێ ئەمنا بەعسیان ل دهۆكێ هاتە تۆپبارانكرن
رەمەزان دەشتمری/ زاخۆ
ل سەر دەمێ شوڕەشا گولانێ چەند خولێن فێركرنێ د وارێن جودا جودا دا بۆ هژمارەیەكا كادرێن پێشمەرگەیی هاتنە ڤەكرن، ژ وان خولێن سەركەفتییانە یا توپچییێ ل بارەگایێ لیژنا ناوچەیا زاخۆ ل گەلییێ هاروینا دا هاتە ڤەكرن.
كادرێ پێشكەفتی یێ لیژنا ناوچا زاخۆ هەڤال (فەهمی عریف سالح) ئەڤ چەندە دا دیاركرن و گوت: ل سالا 1987 خولەكا فێركرنا توپچییێ ل بارەگایێ لیژنا ناوچا زاخۆ ل گەلییێ هارووینا ب سەرپەرشتییا چەند مامۆستایێن شۆرشێ هاتە ڤەكرن، ئەڤ خولە بۆ دەمێ (45) ڕۆژان ڤەكێشا و ئەز د ڤێ خولێ دا بوومە سەركەفتیێ ئێكێ و پشتی ئەڤ خولە ب دوماهیك هاتی مە شییا ب چەكێ توپا (120) ملم كاری ل سەر ڤی چەكی بكەین، و بۆ توپبارانكرنا جهێن گرنگێن حوكمەتێ گوللەباران بكەین. و مە وەك هێز پشتەڤانیا لیژنا ناوچا زاخۆ و ب هەڤكاری ل گەل لیژنا ناوچا دهۆكێ ل ڕۆژا 13/5/1988ێ ل پشتا گەلیێ دهوكێ نێزیكی (17) هەڤدە گوللەیان بارەگایێ ئەمنا دهۆكێ توپباران بكەین، ل دویڤ وان پێزانینێن گەهشتینە مە چەند گوللە توپ ب ئارمانج و نیشان ل ناڤا ئاڤاهیێ بارەگایێ ئەمنا دهۆكێ كەفتن و زەزەر و زیان گەهشتنە ڕەشەكێن بەعسیان. ب ڕاستی شۆڕەشا گولانێ شۆڕەشەكا نیشتمانی و هەڤچەرخ بوو و چەندین خۆلێن پێگەهاندنێ د وارێ جودا جوادا هاتنە ڤەكرن، و كادرێن چەلەنگ و خودان شییان د ناڤ ئەڤان خولان دا ژی هاتنە پێگەهاندن.
سلاڤ ل بیرەوەریا شۆڕەشا 26 گولانا پێشكەفتنخواز و نەمری و سەروەری بۆ گیانێ شەهیدان و هەر بژیت پێشمەرگە و بەرز و بلند بیت ئالایێ كوردستانێ.
