حوكمەتا ئیراقێ دێ دووڤچوونا ئاریشەیێن یانەیێن پلا نایاب كەت
ئێكەتیا تەپا پێی یا ئیراقێ د كۆمبوونا خوە یا ڤێ دووماهیێ دگەل سەرۆك و نوونەرێن یانەیێن پشكدار د خولا پلا نایاب دا چەند بابەت و رۆهنكرن ل سەر چاوانیا بڕێڤەبرنا وەرزێ نوو یێ 2023-2024 یا خولا پیشەكاران دا دیاركرن پشتی ئەوان گرێبەستەكا سێ سالی دگەل دەستەیا لالیگا یا ئسپانی ئیمزاكری ژبۆ پێشئێخستن و گوهۆڕینا خولا نایاب بەر ب پیشەكاران.
ژ گرنگترین ئەوان بابەتێن د ناڤ كۆمبوونێ دا هاتین ئەوژی، هەر یانەیەكا پشكدار د خولێ دا گازندە و كێماسیێن خوە نڤێسینە و دێ بۆ ئەنجوومەنی وەزیرێن ئیراقێ هێتە بلندكرن ژبۆ دووڤچوون و چارەسەركرنا ئەوان ئاریشەیان، دیسان بڕیارە خولا نایاب ب پیشەكاری بهێتە دەستپێكرن بۆ وەرزێ بهێت و ل دووڤ سیستەمێ رێپێدانا ئاسایی جۆرێ a، وەرزێ بهێت خول ب پشكداریا 20 یانەیان پشتی داكەفتنا دو یێن وەرزێ ئەڤ سالە دگەل هاتنا یانەیێن مینا و ئەمانەت بەغدا، ژ وانا یانەیان دڤێت هەتا 14 بوو 16 یانەیان رێپێدان هەبیت و چو سكالایێن یاریزانێن نافخۆ، پیشەكار و راهێنەران ل سەر نەبن، دیسان راهێنەرێ تیما پێشكەفتیان دڤێت هەلگرێ باوەرناما راهێنانا جورێ pro و هاریكارێن وی ژ جورێ a بیت، دیسان هاتە دیار كرن گرێبەستا دگەل دەستەیا لیگایی دو ملیۆن و پێنچ سەد هزار دۆلارن و یا پێشكەفتنا یاریزانێن بەهرەدار سێ ملیۆن دۆلارن و ئەڤ خالە دێ ب رژدی هێنە بجه ئینان.
