دهۆك كانیا فۆتسالا كچانە و نەشێت مفایی ژ مێڤانداریا قارەمانیێ وەربگریت
دهێتە چاڤەڕێكرن سوبەهی هەڤڕكیێن كۆپا ئیراقێ یا فوتسالێ ل هۆلا گرتیا كۆلیژا پەروەردەیا چەستەیی و زانستێن وەرزشی ل زانكویا دهۆك ب پشكداریا 10 یانەیان بهێتە كرن ئەوا دێ هێنە بەلاڤكرن ل سەر دو كۆمان و رۆژانە چار یاری بەردەوامبن و دو تیم ژ هەر كۆمەكێ دەربازبیتە چارگۆشەیا زێرین، یا جهێ سەرنجراكێشێ پارێزگەها دهۆكێ مێڤاندارە و چو یانە پشكدار نینن، ل دۆر ڤێ یەكێ رۆژنامەیا ئەڤرۆ دیدارەكا تایبەت دگەل ئێك ژ راهێنەر و شارەزایێن دیار ل پارێزگەها دهۆكێ سازكریە و بڤی رەنگی بوویە.
خەیری ئەحمەد شارەزا و راهێنەر و مامۆستایێ زانكۆیێ بۆ یاریا فۆتسالێ گۆت: جهێ داخێ یە پارێزگەها دهۆكێ ئەوا دهاتە هژمارتن كانیا فوتسالا كچان ل كوردستانێ و ئیراقێ كو چەند یانەیێن وێ شیایە ناسناڤێن كوردستانێ و ئیراقێ ب دەستڤە ئیناینە وەكو زێرەڤانی سێ ناسناڤێن كوردستانێ، سێمێل ناسناڤێ ئیراقێ و ئافرەتێن دهۆكێ ناسناڤەكا كوردستانێ و مخابن ئەڤرۆ مێڤانداریا قارەمانیا كۆپا ئیراقێ بكەت و چو یانە نینن پشكداربن و مفایی ژ ئەرد و جەماوەرێ خوە وەربگریت، هەكە یانەكا پارێزگەهێ پشكدار با نەبتنێ دا وەكو هژمار دناڤ قارەمانیێ دا بیت بەلكو یا هەڤڕك ژی بیت، جهێ سەرنجراكێشێ یە بەری دو حەفتیان فوتسالا زاخۆ باشترین ئاست و ئەنجام شیا رێزا دویێ یا كوردستانێ بهێت لێ بۆ قارەمانیا ئیراقێ ئەوا دێ ل پارێزگەهێ بیت نەشێا پشكدار بیت ژبەر نەبوونا پشتەڤانیێ و خوە ڤەكێشا.
هەروەسان ناڤهاتی گۆت: د بیت بەرپرسێن وەرزشی و پارێزگارێ دهۆكێ د ناڤ چالاكیێن قارەمانیێ دا بەرهەڤبن و دەستخووشیێ لێ بكەن مخابن چ یانەیێن پارێزگەهێ ناڤ دانەبن و پشتەڤانیێ ل تیمەكێ ناكەن كو ببیتە نوونەرا پارێزگەهێ، بۆ زانین زێدەتری 30 یاریزانێن باش هەنە و د شیان دا بوو هەتا دو تیمان ژی دروست بكەن بتنێ هەكە پشتەڤانی بوو هەبا كرن و گرنگ نە بوو كیش یانە بان بەلكۆ نوونەرا پارێزگەهێ با یە.
ژلایەكێ دووڤە ئەوچەندە ژی دیار كر ب نەچاری وەكو راهێنەر ژلایەكێ ڤە دگەل پێنچ یاریزانێن پارێزگەهێ تیمەكا پارێزگەها دیۆانیە ل پارێزگەها خوە دا بڕێڤەببەن و چەندین یاریزانێن دی بۆ یانەیێن جودا دێ یاریێ كەن ئەڤچەندە ژی پشتی چو یانەیان پشتەڤانی لێ نەكری و گۆت: هیچ یانەكێ بلا نە بێژیت یاریزانان تیما مە یا هێلایی بەلكو ئەوان یاریزانێن خوە هێلان و یاریزان نەچاربوون یاریێ بۆ یانەیێن دەرڤەیی پارێزگەهێ بكەن، لەوما هیڤییا مە ئەوە ژ پارێزگارێ دهۆكێ د. عەلی تەتەر دووڤچوونا ڤێ یاریێ بكەت و ئەڤان یاریزانێن كچ ڤەگەڕێنتە دناڤ تیمێن پارێزگەهێ دا و پشتەڤانیا وان بكەن ژبەركو چو كۆژمەكێ مەزن لێ نا هێتە مەزاختن.
ل دووماهیێ خەیری ئەحمەد گۆت: مە گەلەك جاران بەحس ل سەر فوتسالا كچان كریە و بۆچوون بۆ پێشكەفتنا وێ كریە لێ چو پووتە بۆ نە هاتە دان، د دەمەكی دا فوتسالا پارێزگەهێ د كۆپیتكێ دا بوو، یانەیێن زێرەڤانی، سێمێل، ئاكرێ، شێخان، گارە و ئافرەتێن دهۆكێ هەمی پێكڤە كارەكێ مەزن دكرن و كچێن پارێزگەهێ بوونە قارەمانێن كوردستانێ و ئیراقێ و پارێزگەها دهۆكی بوو كانیا فوتسالا كچان لێ دبیت هەبوونا هندەك كەسان د ناڤ ڤێ یاریێ دا نە تایبەتمەند بوون بۆ ئەگەر ئەو چالاكیا مایی نە مینت.
بۆ زانین خەیری ئەحمەد خودانێ دو باوەرنامەیێن ئاسایی لێڤل ئێك و دو دگەل باوەرنامەیێن تایبەت یێن ئاسیایی، ئەفریقیا و ئۆرۆپا یێن راهێنانێ و تایبەتمەندی ب یاریا فۆتسالێ ل زانكویا دهۆك باوەرنامەیا ماستەر یا هەمان یاری.
