سیروان نەجمەددین: ئێكەم جارە ل سەر ئاستێ ئیراقێ سیستەمێ ڤارێ ل دهۆكێ هاتە ب كارئینان
دوهی ب شێوەكێ فەرمی قارەمانیا كۆپا ئیراقێ یا فۆتسالا كچان ب مێڤانداریكرنا پارێزگەها دهۆكێ و پشكداریا دەهـ یانەیێن ئیراقێ و كوردستانێ هاتە ئەنجامدان، ئەوا دهێتە هژمارتن بۆ جارا ئێكێ د دیرۆكا وەرزشا ئیراقێ و هەرێمێ دا ب كارئینانا سیستەمێ ڤار یێ تایبەت ب دووڤچوونا هەر لڤینەكا نە یاسایی یان گۆلەكا ب گۆمان یان ژی ئالۆزیەك پەیدابیت دناڤبەرا یاریزانان دا كو دێ ب چاڤدێریا ئامیرێن ڤیدیۆیێ بیت ژلایێ چەند دادڤانێن پسپۆر هێتە ب كارئینان.
سیروان نەجمەددین سەرۆكێ لژنەیا بەریكانەیان ل كۆپا ئیراقێ بۆ رۆژناما ئەڤرۆ گۆت: پارێزگەها دهۆكێ دێ بیتە ئێكەم جهـ ل سەر ئاستێ ئیراقێ و هەرێما كوردستانێ سیستەمێ ڤار یێ جیهانی بۆ چالاكیەكا فەرمی ب كاربینت، پشتی ئێكەتیا تەپا پێی یا ئیراقێ بڕیار دایی د قارەمانیا كۆپا یا فوتسالا كچان بۆ جار ئێكێ بهێتە ب كار ئینان، ئەڤ سیستەمە دێ ب شەش كامیرێن ڤیدیۆیێ ل دەوروبەری یاریگەهێ هێنە دانان بۆ دیتنا هەموو حالەتێن د دەمێ یاریێ دا پەیدا دبن كو سێ دادڤانێن پسپۆر چاڤدێریێ كەن و هەردەمێ حالەتەكێ بهێتە دیتن و دادڤانێن دناڤ یاریگەهێ دا نەبینن ئێكسەر بڕێیا مایكا بلۆتوسێ دێ دادڤانێن یاریگەهێ هێنە ئاگەهداركرن بۆ دۆبارە دیتنا ئەوێ حالەتێ پەیدابوویی، بۆ نموونە یێ فاولێ، پەنەلتیێ، گۆل یان ئالۆزی و یاریا زڤڕ و توند بهێتە كرن.
هەروەسان ناڤهاتی گوت: ئەڤ قارەمانیە ب هەڤكاریا پارێزگەها دهۆكێ و پشتەڤانیا ماددی بۆ یانەیان و رێكخستنا قارەمانیێ ژلایێ ئێكەتیا تەپا پێی یا ئاسیا دهێتە بڕێڤەبرن ئانكو چو یانە مەزاختیێ هۆتێل و خوارنێ و هاتنۆچوونێ ناكەن، ب دیتنا من ئەڤ قارەمانیە دێ یا ب سەركەفتی بیت ژبەر هەموو خالێن باشیێ ل پارێزگەهێ و دانانا سیستەمێ ڤارێ، بتنێ دێ بێژم مخابن چو یانەیێن پارێزگەها دهۆكێ مفا ژ ڤێ قارەمانیێ وەرنەگریتە سەرباری دناڤ باژێرێ وان دا دهێتە كرن.
