هشیار شه‌هباز: زاخۆ د ره‌وشه‌كا باش دایه و گه‌شبینین بۆ سه‌ركه‌فتنێ
عەلی حاجی:
د داخویانیەکێ دا سکرتێرێ یانه‌یا زاخۆ یا وەرزشی بۆ رۆژناما ئەڤرۆ دیار کر وان سەرکەڤتن بتنێ د دو یاریێن بهێت دا نەڤێت بەلکو سەرجەمێ شەش یاریێن مایی ژ خولێ دێ شه‌ڕێ سێ خالان كه‌م پێخه‌مه‌ت بەر ب رێزێن پێشیێ بچیت.
زێدەتر هشیار شەهباز گۆت: پشتی بۆ ماوه‌یێ 20 رۆژان ژ راوەستیانا خولا نایابا ئیراقێ تیما زاخۆ دو یاریێن هەڤالینی ئەنجامدان كو ل دووڤ پلانێن راهێنه‌ری بوون ژبۆ باشترین به‌رهه‌ڤی بۆ یاریێن مایی، هەمی یاریزانان موچەیێ خوە وەرگرتینە و چو کێشە د ناڤ تیمێ دا نینن رەوشەکا باش دەرباز دكیت ب تایبەتی ژی پشتی هاتنا راهێنەرێ سوری نزار مەحروسی، راهێنەری سوری بۆ كارگێریێ دیار کریە ئه‌وان پێدڤی ب یاریزانێ ئوردنی ماهر حیجازی نینن لەوما د پلان دا نینە ئەم جارەکا دی ڤەگەرینە دگەل یانێ ژبەرکو نوکە ل وەلاتێ ئوردنێ و هەلبژارتیێ وەلاتێ خوەیە دیسان دگەل وی یاریزانی گەهشتینە رێکەڤتنێ بەرانبەر دانا نیڤ موچەیێ وی ئەو ڤەنەگەریتە زاخۆ ژبەرکو گرێبه‌ستا وی دێ ل رێکەڤتی ١٧/٧/٢٠٢٣ ب دووماهی هێت لێ هەکە ڤەگەریت ژی بتنێ دێ شێت یاریەکا دیتر ئەنجامدەت كو دێ بارگرانیا ماددی ژی ل سەر یانێ دروستکەت.
ناڤبری گۆت ژی: مه باوەری ب کادرێ راهێنەران و یاریزانێن خوە هەیە بۆ یاریێن بهێت ئەنجامێن باش ب دەستخوەڤە بینن و ب هێڤینە ژی د شەش یاریێن مایی ژ خولێ دا تیم بەر ب قوناغەکا باشتر بچیت.
