یانەیێن كوردستانی دێ بزاڤێن سەركەفتنێ كەن
قەیس وەیس
پشتی راوەستیانەكا درێژ بۆ ماوەیێ سێ حەفتیان دۆبارە هەڤڕكیێن خولا ئیراقێ یا تەپا پێی بۆ یانەیێن پلا نایاب ڤەگەڕیان، ئەوا بڕیارە ل ئەینیا بهێت ب ئەنجامدانا یاریا نەفت ئەلوەسەت و سیناعە دەست ب گەڕا 33ێ هێتە كرن، سێ یانەیێن كوردستانی دێ ژ دەرڤەیی یاریگەهێن خوە بنە مێڤانێن یانەیێن ناڤەڕاست و باكۆرێ ئیراقێ و یانەك ل یاریگەها خوە دێ مێڤانداریا تیمەكا بەغدایی كەت.
– دهۆك بەرانبەر ئاستەنكا ئەلقاسم
دهێتە چاڤەڕێ كرن ل شەمبیا بهێت دەمژمێر 7:15ێ شەڤ تیما یانەیا دهۆك ل یاریگەها كەربەلا ببیتە مێڤانا یانەیا ئەلقاسم د یاریەكا ب سانەهی نابیت بۆ ئەلهۆیێن چیا ئەوا نوكە ب45 خالان رێزا هەشتێ دهێت ژ 11 سەركەفتن، 12 وەكهەڤی و نەهـ خوسارەتی، بەرانبەر دا تیما ئەلقاسم د رێزبەندیەكا خراب دایە ب33 خالان رێزا17ێ دهێت، لێ بۆ یاریا ئەڤرۆ تیمەكا ب زەحمەت بیت تایبەت پشتی شیایی د هەشت یاریێن بۆری یێن خولێ چو خوسارەتیا نەدەت و ئاستێ خوە پێشبێخیت شەش وەكهەڤی و دو سەركەفتنان بینت، ژلایێ خوەڤە راهێنەرێ دهۆكێ سلێمان رەمەزان بۆ رۆژناما ئەڤرۆ دیاركربوو راوەستیانا خولێ یا فەر بوو وەكو بهێنڤەدانەك بۆ یاریزان ژلایێ چەستەیی و دەرۆنی بوو دیسان كار ل سەر باشترنا ئاستێ تیمێ.
ژ یاریێن دی یێن رۆژا شەمبی، نەورۆز دێ ل یاریگەها شەعب دەمژمێر پێنجێ ئێڤاری بیتە میڤانا دیوانیە، نوونەرا دویێ یا كوردستانی 41 خال كۆمكرینە و رێزا 13ێ دهێت بەرانبەر دا تیما دیوانیە بتنێ12 خال هەنە رێزا 20 و دووماهیێ دهێت و تا رادەیەكی پاشڤەچوونا خوە بۆ پلا ئێك دیاركریە، دیسان ژ یاریێن شەمبیێ حدوود- كەربەلا، جەوییە- زەورا، نەفت میسان- كارەبا.
– زاخۆ دێ بزاڤێن دۆبارە سەركەفتنێ كەت
بڕیارە كوڕێن خابووری بەر ب پایتەختێ ئیراقێ بەغدا بچن ژبۆ ئەنجامدانا دیدارا خوە یا چاڤەڕێ كری ئەوا دێ ل ئێكشەمبیا بهێت دەمژمێر پێنجێ ئێڤار ل یاریگەها شەعب ببیتە مێڤانا یانەیا نەفت د یاریەكا هەڤڕكی و تۆلڤەكرنێ دا، تیما زاخۆ ل رێزا 15ێ دهێت ب كۆمكرنا 36 خالان ژ هەشت سەركەفتن، 12 وەكهەڤی و12 خوسارەتی، تیما مێڤاندار 30 خال كۆمكرینە و رێزا 18ێ دهێت، ئەڤ یاریە بۆ نوونەرا ئیدارا سەربەخوەیا زاخۆ ب زەحمەتە ژبەر كو تیما نەفتێ دێ شەڕەكێ مەزن كەت بۆ سێ خالان و خوە ژ رێزبەندییا داكەفتنێ قورتابكەت و قەرەبوویا یاریا بۆری بكەت لێ زاخۆ ژی ئارمانج هەیە و دوبارە سەركەفتنا خوە ل سەر نەفتنێ بینت.
ژ یاریێن دی یێن رۆژا ئێكشەمبی، نوونەرا چارێ یا كوردستانێ تیما هەولێر دێ ل یاریگەها خوە شەهید فرانسۆ حەریری دەمژمێر نەهی شەڤ مێڤانداریا یانەیا كەرخ یا بەغدایی كەت، هەولێر خودانا رێزا حەفتێ یە ب45 خالان و شیایە د گەڕا دویێ دا ئاست و ئەنجامێن باش بینت، كەرخ 43ێ خال هەنە رێزا 11ێ دهێت، هەر ژ یاریێن ئێكشەمبیێ نەجەف- شورتە، تەلەبە- نەفت ئەلبەسرا.
بۆ زانین شورتە ب 62 خالان سەرێ لیستێ دهێت، جەویە ب 65 خالان، زەورا57خالان، كارەبا 54، تەلەبە53ێ، نەجەف 49 خالان رێزێن دویێ هەتا شەشێ ل دووڤ ئێك
