د. ئەحمەد قاسم: ب كارەكێ كۆم دێ شێین وەرزشا پارێزگەها دهۆكێ پێشئێخین
ل ئەینیا بۆری هەلبژارتنێن دەستەكا نوو یا نوونەراتیا دهۆك یا لژنا ئۆلمپیا ئیراقێ – كوردستانێ هاتنە ئەنجامدان ئەوا ژلایێ لژنا ئۆلمپی یا ئیراقێ ب سەرپەرشتیا لژنەیا هەلبژارتنان ڤە هاتیە بڕێڤەبرن پێكهاتی بوون ژ عەلی ئەلبەدری سەرپەرشتێ هەلبژارتنێ و راوشكارێ قانوونی، ئەسعەد ئازریج و لەیس خزر ئەندامێن سەرپەرشت و سەعید ئەحمەد نوونەرێ لژنەیا ئۆلمپیا كوردستانێ
ل دەستپێكێ ژبۆ ژێگرتنا نوونەرێن سێ كەسێن دەرڤەیی ئێكەتیێن نە ئۆلمپی پێخەمەت وەرگرتنا مافێ دەنگدانێ بۆ ژێگرتنا دەستەكا گشتی ل دووڤ رێنمایێن هەلبژارتنان، هەردو ئێكەتیێن نە ئۆلمپی یا كاراتێ و كیك بۆكسینگ دەنگدان بۆ ئێك مافێ دەنگدانێ كر ئەوا بەختیار تەحسین سكرتێرێ كیك بۆكسینگێ ب كۆمكرنا 10 دەنگان وەرگرت، ل سەر ئاستێ وەرزشڤانێن دێرین دو كەسان خوە بەربژاركربوون پشتی دەنگدانێ ئەمیر عەبدولعەزیز ب كۆمكرنا 12 دەنگان مافێ دویێ وەرگرت، یا سێیێ بۆ رەكەزێ ئافرەتێ بوو، نیڤیان یاسر بێ هەڤڕك مافێ سێیێ یێ دەنگدانێ ب 12 دەنگان وەرگرت.
دووڤدا پرۆسێسا هەلبژارتنێن دەنگدانێ بۆ دەستەكا نوو یا نوونەراتیا دهۆك لژنەیا ئۆلمپیا ئیراق- كوردستانێ هاتە كرن ئەوا بەرهەڤبوونا 17 ئێكەتیێن ئۆلمپی، ئێكەتیەكا نە ئۆلمپی و وەرزشڤانەكێ دێرین و ئێكا ئافرەت، پشتی ڤاڤارتنا دەنگان ئەنجام بڤی رەنگی بوون، د. ئەحمەد قاسم ب كۆمكرنا 17 دەنگا وەكو سەرۆكێ نوونەراتیێ پۆستێ خوە پاراست، ل سەر ئاستێ جێگرێ سەرۆكی هەڤڕكی دناڤبەرا دو كەسان بوون، مەحمۆد محەمەد ب 10 دەنگان پۆستێ جێگریێ وەرگرت، ئەوا هەڤڕكێ وی د. جەلال كەمال هەشت دەنگ كۆمكرین، د. نیڤیان یاسر وەكو ئافرەتا ئێكانە و ئەنداما كچ و بەربژار بۆ ئەندامەتیا نوونەراتیێ 15 دەنگ كۆمكرن.
ئەسعەد ئازریج ئەندامێ لژنا هەلبژارتنان گۆت: ب شێوەكێ ئازادیانە و قانوونی هەلبژارتنێن نوونەراتیا دهۆك بڕێڤە چوون و بێ گازندە و چو ئاریشە نەبوون، پیرۆزباهیا سەركەفتیان دكەین و هیڤییە باشترین شێوە خزمەتا وەرزشا پارێزگەها دهۆكێ بهێتە كرن، د رۆژێن بهێت دا دێ ژڤانێ هەلبژارتنێن نوونەراتیێن هەولێر و سلێمانیێ ژی هێنە دەستنیشانكرن.
ژلایێ خوەڤە د. ئەحمەد قاسم سەرۆكێ نوونەراتیا دهۆك یا لژنا ئۆلمپی گۆت: سۆپاسیا هەمی هەڤالێن خوە و وەرزشڤانێن پارێزگەهێ دكەین كو دۆبارە باوەریا خوە دایە مە، پێنەڤێت ئەڤە بەرپرسیارەتیەكا مەزنە و جهێ شانازیێ یە خزمەتا وەرزشا پارێزگەها خوە بكەین، پیرۆزباهیا هەڤالێن خوە ژی دكەم، ب ئانەهیا خۆدێ بۆ داهاتی دێ كۆمبوون هێنە كرن و چەندین تەوەر و پلانێن جودا هەبن پێخەمەت بهێزكرن و رێكخستنا وەرزشا پارێزگەها دهۆكێ و پێنگاڤێن ئەكتیڤ ژی دێ هەبن، ئەڤ پلانە ژی ب كارەكێ كۆم دهێتە بجهئینان ژ پشتەڤانیا پارێزگەها دهۆك، بەرپرسێن حزبی و حكومی و دەزگەهێن راگەهاندنێ و رژدین بۆ پێشئێخستنا وەرزشا پارێزگەهێ.
