عەمار ئێكانە كوردە و گەشبینە رێزێن ئێكێ یێن ئاسیایی ب دەستڤە بینت
كوڕێ پارێزگەهێ و یانەیا دهۆكێ و یاریزانێ هەلبژارتیێ ئیراقێ یێ لاوان بۆ یاریا تەپا سەر مێزێ عەمار محەمەد جەمیل دێ پشكداریێ د چاپا 27ێ یا قارەمانیا ئاسیا ل سەر ئاستێ لاوان بۆ كوڕ و كچان كەت ئەوا بڕیارە هەڤڕكیێن وێ ئەڤرۆ ب پشكدارییا 213 یاریزانان ژ 24 هەلبژاتییان ل وەلاتێ قەتەر بهێتە كرن.
ل دۆر دووماهی بەرهەڤی و هیڤیێن یاریزانێ كورد عەمار محەمەد بۆ رۆژنامەیا ئەڤرۆ گۆت: ئێكانە یاریزانێ كورد و پارێزگەها دهۆكێ دگەل هەلبژارتیێ ئیراقێ دێ پشكداری قارەمانیا ئاسیا كەم كو دهێتە هژمارتن ئێك ژ ب هێزترین هەڤڕكیێن ل سەر ئاستێ لاوان ژبەر هەبوونا یاریزانێن بەهرەمەند و خودان سەنگ د یاریا تەپا مێزێ دا كو دێ باشترین یاریزانێن كێشوەرێ ئاسیا هەڤڕكیێ بۆ ناسناڤی كەن تایبەت ئەو وەلاتێن پێشكەفتی وەكو چین، ئیران، كوریا، ئەڤچەندە دەلیڤەیە بۆ مە ئاستێ نیشان بدەین و پێشبێخین.
هەروەسان ناڤهاتی گۆت: بەری پشكداریێ دگەل هەلبژارتیێ ئیراقێ بكەم كەمپەكێ راهێنانێ مە ئەنجامدابوو پێخەمەت باشترین بەرهەڤی، هەرچەندە ئەركێ من ب سانەهی نابیت لێ هیڤی و ئارمانجێن من د مەزنن و گەشبینم ب ئالایێ كوردستانێ پشكدارییەكا سەرفەراز بكەم و بۆ رێزبەندیێن پێشییێ ژی هەمی بزاڤان كەم دەستڤە بینم.
بۆ زانین یاریزان عەمار محەمەد دگەل پیرس عەلی و سارا بەشار كوڕ و كچێن پارێزگەهێ دێ ب ناڤێ هەلبژارتیێ ئیراقێ پشكداری قارەمانیا عەرەبی ژی كەن ئەوا بڕیارە هەڤڕكیێن وێ ل 28ێ ڤێ هەیڤێ باژێرێ سلێمانیێ مێڤاندارییا وێ دكەت و دهێتە پێشبینیكرن ژی ل چرییا دویێ یا بهێت پشكداریا قارەمانییا ئاسیا یا شێوازێ گشت ل كوریا باشۆر بكەن و دووڤدا قارەمانیێن نێڤدەولەتی ل كازاخستان و ئۆردنێ.
