بۆ وەرزێ دویێ ل دووڤ ئێك شورتە بوو قارەمانا خولا ئیراقێ
بۆ جارا دویێ ل دووڤ ئێك تیما یانەیا شورتە یا بەغدایی ناسناڤێ خولا پلا نایابا ئیراقێ یا تەپا پێی و بۆ جارا حەفتێ د دیرۆكا خوە دا ب دەستڤە ئینا، پشتی د یاریا گەڕا 37ێ و بەری دووماهییا خولێ ب ئێك كەڕ سەركەفتی ل سەر یانەیا نەفت ئەلمیسان ب سێ گۆلان بێی بەرانبەر، ژلایێ خوەڤە هەردو یانەیێن دهۆك و زاخۆ بەردەوامی دا ئەنجامێن لاواز و مانا خوە د خولێ دا پاراست.
شۆرتە گەهشتە ستێرا حەفتێ
تیما شۆرتە شیا ناسناڤی ب دەستڤە بینت پشتی 79 خال كۆمكرین ب جووداهیا چار خالان ژ هەڤڕكا خوە یانەیا جەوییە ل رێزا ئێكێ هات و ناسناڤێ خولێ مسۆگەر بیت بەری ب دووماهی هاتنا وەرزێ ئەڤ سالە ب ئێك گەر، گۆلكەرێن وێ عەلا عەبدولزەهرە ب12 گۆلان، ئەحمەد فەرحان ب10 گۆلان و محەمەد ئەلمواسە ب نەه گۆلان شیان ببنە ئەگەرێن سەركەفتنێن گەلەك یاریێن تیما خوە،
دهۆك و زاخۆ ب لاوازترین ئاست و ئەنجام مانا خوە پاراستن
پشتی ب دووماهی هاتنا یاریێن گەڕا 37ێ و بەری دووماهیێ هەردو یانەیێن دەڤەرا بەهدینان و نوونەرێن پارێزگەهێ تیما یانەیا دهۆك و یانەیا زاخۆ مانا خوە د خولا پلا نایاب دا پاراستن سەرباری ئاست و ئەنجامێن لاواز تایبەت د قۆناغا دویێ یا خولێ دا، دهۆكێ دووماهی خوسارەتی یا دناڤ ئەرد و جەماوەرێ خوە دا ل شەمبیا بۆری بەرانبەر حدوود ب دو گۆلێن پاقژ بوو، ب كۆمكرنا 49 خالان رێزا 12ێ دهێت ژ11 سەركەفتن، 16 وەكهەڤی و10 خوسارەتییان، تیما دهۆكێ هەتا گەڕا 31ێ ل رێزا شەشێ ب 45 خال كۆمكربوون لێ د گەڕا 32ێ دا پشتی ب چار گۆلان بەرانبەر دو گۆلان دگەل نەجەف د ئەردێ خوە دا خوسارت بوویی پاشڤە هاتە رێزا هەشتێ كو بوو دەستپێكا كەفتنا وێ د رێزبەندیێ دا، دووڤدا یاری بۆ یاریی ئاست و ئەنجام خوەجه نەبوون، هەرچەندە ستێرا وێ یێ كۆتیڤۆاری گراهێریانیك زاكێری شیابوو نەه گۆلان و برێنس ئۆبۆكۆ هەشت گۆلان بینن.
ژلایێ خوەڤە تیما یانەیا زاخۆ ژی مانا خوە د خولێ دا پاراست سەربارەی خوسارەتیا وێ دگەل یانەیا جەوییە یا بەغدایی ب دو گۆلان بەرانبەر گۆلەكێ، كوڕێن خابۆری 41 خال كۆمكرینە و رێزا 14ێ دهێت ژ نەهـ سەركەفتن، 14 وەكهەڤی و 14 خوسارەتی، د ماوەیێ هەردو قۆناغان دا رێزبەندییا زاخۆ ژ 10 هەتا 17ێ دەربازكربوو، د دەمەكی دا ترسا داكەفتنێ ل سەر هەر هەبوو لێ پشتی گوهۆڕتنا راهێنەرێ خوە حەیدەر عەبدلئەمیر و هاتنا یێ سوری نزار مەحرۆس ئاستێ وێ ژ بەری هاتنا وی باشتر لێهاتن، گۆلكەرێن تیمێ هەتا بەری ب دووماهی هاتنا خولێ ب ئێك گەر فەرحان شكۆر ب هەشت گۆلان، خالد رازی و عومەر مەنسۆر هەر ئێك ب چار گۆلان.
هەولێر و نەورۆز ژ قۆرتالكرنێ بەر ب رێزبەندیێن باشتر
هەردو یانەیێن هەولێر و نەورۆز ئەوێن د قۆناغا ئێكێ دا ئاست و ئەنجامێن وان د باش نەبوون، شیان د قۆناغا دویێ دا باشتر لێبكەن و د رێزبەندیێن 17 و 18ێ پێشڤە بهێنە رێزێن هەشت و نەهێ، تیما هەولێر 52 خال كۆمكرینە بەری یاریا خوە یا گەرا37 و رێزا هەشت هاتبوو، نەورۆز ب51 خالان رێزا نەهێ هاتبوو.
یانەیێن ناسناڤێ خولا ئیراقێ ب دەستڤە ئیناین
ل دووڤ تۆمارا هاتیە ئەرشیفكرن د دیرۆكا خولا ئیراقێ دا ئەوا ئێكەم جار ل وەرزێ 1974-1975ێ هاتیە كرن و جەوییە بۆ جارا ئێكێ بدەستڤەئینایی، یانەیا زەورا خودانا بلندترین رێژەیا ب دەستڤە ئینانا ناسناڤایە ب 14 جاران، جەوییە حەفت جاران، شورتە بوو حەفت جار، تەلەبە پێنچ، هەولێر چار، یانەیا ئەلرەشید سێ جاران، هەر ئێك ژ یانەیا دهۆك، نەفت ئەلوەسەت، ئەلجەیش، سەلاحەدین، مینا هەر ئێك ژوان جارەكێ ب دەستڤە ئیناینە.
