بوردومانێ هژمارەكا خانیێن گوندێن دەڤەرا نهێلێ دەرزاندینە
مەحمود نهێلی:
ژ ئەنجامێ بوردۆمان و توپبارانكرنا چیایێ مەتینا كو دكەڤیتە هنداڤی دەڤەرا نهێلێ ل سنورێ ناوچەدار یا دێرەلۆكێ و چەندین گوندان ب خوە دگریت وەك ئاكنجیێن ڤان گوندان ددەنە دیاركرن كو پرانیا خانیێن وان خراب بووینە و دەرز كەفتینێ.
ل دووڤ گۆتنێن ئاكنجیێن دەڤەرێ ئەڤە هەیاما هەشت سالایە بوردۆمانا فرۆكێن لەشكەرێ توركیا بۆ سەر دەڤەرێ دژوار بوویە و ب تایبەتی ژی د ڤان چار سالێن داویێ دا كو رۆژانە پتر ژ 10 جاران گوندەوارێن دەڤەرا ئامێدیێ، ب تایبەتی ژی ل دەڤەرا نهێلێ دهێنە بوردۆمانكرن و ب شەڤ و رۆژ شەر یێ بەردەوامە.
هەڤال بركاهینی ئاكنجیێ گوندێ بلاڤە ل سنورێ دەڤەرا نهێلێ بۆ رۆژناما ئەڤرۆ دیاركر، ئەڤە هەیاما چەند سالایە بەردەوام دەوروبەرێن گوندێ وان دهێتە بوردۆمانكرن و گۆت: ژ ئەنجامێ ڤێ بوردۆمانێ زیان گەهشتینە خانی و رەز وبیستانێن وانا و ئاشكرا كر، كو رۆژ هەیە پتر ژ 10 جاران ژی چیایێ هنداڤی گوهەرز و بلاڤە دهێتە بوردومانكرن.
وەلاتیێ ناڤهاتی دیار ژی كر، وی وەك هەژمارتن چەندیا هژمارا بوردۆمانێ ل دەڤ خوە دنڤیسین و گۆت: ل سالا 2019 تا 2021 پتر ژ 172 جاران دەوروبەرێن گوندێ وان هاتینە بورۆدومانكرن و ب تنێ ل هەیڤا حەفت یا ئەڤ سالە 24 جاران هنداڤی گوندێ وان هاتیە بوردۆمانكرن.
تەكەز كر، ڤێ بوردۆمانێ ئەنجامێن خراب ل پاش خوە هێلاینە و زیانێن زۆر ژی گەهاندینە خەلكێ دەڤەرێ و گۆت: ژبلی سۆتنا رەز و باغێن وەلاتیان و پیسكرنا ژینگەهێ، ژ بەر دەنگێ بوردۆمانێ هژمارەكا زۆرا خانیێن گوندێ وان دەرز كەفتینێ و بەر ب هەرفینێ نە.
وەلاتیەكی دی یێ گوندێ بلاڤە بۆ رۆژناما ئەڤرۆ دیار كر، رۆژ نینە هەكە دەنگێ شەری و بوردۆمانێ نەهێتە گوندێ وان و گۆت: ژ ئەنجامێ ڤێ بوردۆمانێ دەرزێن مەزن كەفتینە خانیێ وان و بەشەك ژی لێ هەرفتیە و بەرف ژ ناڤچوونێ یە و گۆت: گەلەك جاران ئەو یێ ل سەر خوارنێ و ژ بەر دەنگێ وان موشەكێن ب وی چیایێ هنداڤی مالا وان دكەڤن و پرتێن چیمەنتوی و سەبێ دكەڤنە ناڤ خورانا وانا.
ناڤهاتی هیڤی ژی خواستن كو ئاستەك بۆ ڤان بوردۆمانان بهێتە دانان بۆ وێ یەكێ ئەو ژی بشێن ب ئارامی ل سەر گوندێن خوە ژیانا خوە دەرباز بكەن.
وەلاتیەكی دی یێ ناوچەداریا بامەرنێ بۆ رۆژناما ئەڤرۆ دیاركر، ژ ئەنجامێ توپباران و بوردۆمانێن سوپایێ توركیا بو سەر دەڤەرا وانا زیانێن زۆر گەهشتینە رەز و باغێن وەلاتیان و گۆت: بەری دو رۆژان چەند توپ دەوروبەرێن گوندێ وانا داینە كو دبێژنە وی جهی بەركەلی و بوویە ئەگەرێ سۆتنا رەز و باغێن وەلاتیان.
هەروەسا وەلاتیەكی بەرێ گارێ دیار كر، ئەڤ سالە فرۆكێن توركیا جادا سەرەكی یا دچیتە بەرێ گارێ ل چەندین جهان بوردۆمانكریە و گۆت: ڤێ بوردومانێ زیان گەهاندینە جادەیێ و پتریا ڤێ جادەیێ ژ ناڤبریە و گۆت: دڤێت رادەیەك بۆ ڤێ بوردۆمانێ بهێتە دانان، بۆ وێ یەكێ ئەو ژی بشێن قەستا گوندێن خوە بكەن و ب تایبەتی ژی نوكە وەرزێ دەرامەتی یە.
