پڕۆژەیێ تلفریكا پرا دەلال ب درێژاهیا پتری هزار مەتران دێ هێتە بجهئینان
ئەڤرۆ، لەزگین جوقی:
رێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ دیار كر، بۆ زێدەتر خزمەتكرنا ئیدارەیا سەربخوە یا زاخۆ ب درێژاهیا هزار و 100 مەتران تلفریكەك ل نێزیك پرا دەلال دێ هێتە چێكرن و دبێژیت: ئەڤ پڕۆژە ژ لایێ وەبەرهێنەركێ پارێزگەها دهۆكێ ڤە دێ هێتە بجهئینان.
جگەرخۆین تاهر عەبدی، رێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ئەڤرۆ ئاشكرا كر، پڕۆژەیێ تلفریكا نێزیك پرا دەلال ل زاخۆ، نوكە د قووناغێن گەنگەشێ دایە و ژ لایێ وەبەرهێنەرەكێ خەلكێ دهۆكێ ڤە دێ هێتە بجهئینان و گۆت: «هەر د ناڤ پڕۆژەیێ تلفریكێ دا ل سەر رووبەرێ 18 دۆنەمێن ئەردی خوارنگەه و كافێ و یاریێن زارۆكان و جهێن بێهنڤەدانێ بۆ وەلاتی و گەشتیاران دێ هێنە دروستكرن».
ناڤهاتی گۆتژی: «د چارچوڤێ پڕۆژەیێ تلفریكێ دا هەژمارەكا كافێن گەشتیاری ژی دێ هێنە چێكرن، ئەڤ پڕۆژە دێ گەلەك خزمەتا ئیدارەیا سەربخوە یا زاخۆ كەت و دێ بیتە ئەگەر پتر گەشتیار قەستا زاخۆ بكەن».
