جەنازەیێ فەرماندە لیوا قادر شێخ مەمی ل بامەڕنێ هاتە ڤەشارتن
ئامێدیێ، مەحمود نهێلی:
ب بەرهەڤبوونا هەژمارەكا زۆرا بەرپرسێن حزبی و حكومی و فەرماندەیێن پێشمەرگەی و لەشكری و كەسایەتیێن دەڤەرێ و كەسوكارێن خودێ ژێ رازی و وەلاتیێن دەڤەرێ، د رێورەسمەكێ ژ هەژی دا، جەنازێ فەرماندە لیوا قادر شێخ مەمی ل گوندێ شێخ مەما ل سنوورێ ناوچەداریا بامەرنێ دوهی 23/9/2023 هاتە ڤەشارتن.
بەرەڤان حەمدی، بەرپرسێ لقێ 18 یێ پارتی د پەیڤەكی دا ئاماژە دا خەبات و قوربانیدانا فەرماندە لیوا قادر شێخ مەمی و گۆت: «لیوا قادر رێبازا بابێ خوە هەلبژارت بوو، كو ئەو ژی رێبازا بارزانیێ نەمر، ناڤهاتی هەموو ژیانا خوە بۆ كوردایەتیێ و پێشمەرگاتیێ و بەرەڤانیێ ژ هەبوونا كوردستانێ تەرخانكر بوو، جهێ شانازیێ یە، د ڤی رێورەسمی دا هەموو خەلكێ كوردستانێ ل ڤێرێ ئامادەیە، چیایێ گارە و مەتینان و دەشتێن مووسلێ و سحێلان و هەموو داروبەرێن كوردستانێ شاهدیا قارەمانیا ڤی فەرماندەی ددەن».
ل داویێ ژی بەرپرسێ لقێ 18 ب ناڤێ سەركردایەتیا پارتی سەرەخوەشیێن خوە ئاراستەی مالبات و كەسوكارێن وی و هەڤچەپەر و هەڤالێن وی كرن.
لیوا قادر حسێن شێخ مەمی ژ دایكبوویێ سالا 1962 بوو، خەلكێ گوندێ شێخ مەما یێ گرێدایی ناوچەداریا بامەرنێ سەر ب دەڤەرا ئامێدیێ ڤە بوویە، دەرچوویێ پەیمانگەها تەكنولۆژیایێ بوو، پاشان بكالۆریۆس ب یاسایێ وەرگرت بوو، پشكداری د سەرهەلدانا بهارا سالا 1991 دا كربوو.
چەندین پۆستێن حزبی و سەربازی وەرگرتینە و ئێك ژ فەرماندێن هەرە وێرەك و خودان شیان بوویە د شەرێن دژی داعشێ و حەشدا شەعبی دا و چەندین داستان تۆماركرینە، ب پلا لیوا هاتبوو خانەنشیكرن و ل ڤێ داویێ تووشی نەخوەشیێ ببوو، ل نەخۆشخانەكا وەلاتی توركیا وەغەرا داویێ كر.
