قەیرانا دارایی كارتێكرن ل سەر دەرئێخستنا زەلامان هەیە
هەولێر، قائید میرۆ:
سەرۆكێ رێكخراوا زەلامێن كوردستانێ بو رۆژناما ئەڤرۆ ئاشكرا كر، ژبەر ڤێ قەیرانا نوكە هەرێما كوردستانێ تێدا دەرباز دبیت ژمارا وان زەلامێن ژ مال هاتینە دەرخستن زێدە بوویە و گۆت: ل سەر كاری زۆری ل زەلامان دهێتە كرن و ل مال ژی ژن سفكاتیێ ب زەلامی دكەت، زەلامێن نوكە نەچارن ژبەر توندۆتیژیێ و پت پتا ژنێ ژ مال د ڕەڤن و ئەڤ سالە زۆرتر سكالا دهێنە تۆمار كرن ژلایێ زەلامان ڤە.
بورهان عەلی، سەرۆكێ ئێكەتیا زەلامێن كوردستانێ دیار كر، دەمێ هەر وەلاتەك تووشی قەیرانەكێ دبیت ئەڤێ قەیرانێ دێ كارتێكرن ل سەر جڤاكی هەبن ژ وانژی خێزان تووشی ئاریشەیان دبیت، ل گورەی قانوونا بارێ باژێڕی ل عیراقێ زەلام بەرپرسە ژ دابینكرنا مەزاختیێن مال، لەوڕا ژی ژ ئەگەرێ ئەڤێ قەیرانا نوكە هەرێما كوردستانێ تێدا كو مووچە د دەمێ خوەدا ناهێنە بەلاڤكرن و بێكاری بەر ب زێدەبوونێ یە و ئەركێ زەلامان گران بوویە و ژبلی نەبوونا داهاتی و گۆت: (نوكە مەزاختیێن خێزانێ ژی زێدە بوینە و وەك بەرێ نەمایە، ئەڤە ژی بۆیە ئەگەر زەلامێن هەرێما كوردستانێ بكەڤنە بن ئەركەكێ دژوار، ژلایەكێ ڤە كار دەست ناكەڤیت یان هەكە كار دەست بكەڤیت ژی خودانێ كاری زوریێ لێ دكەت كو بهایەكێ ئەرزان بو كار بكەت و دەمێ ڤەدگەڕیتە مال ژی هەڤژینا وی زۆریێ لێ دكەت،مخابن ڤێ قەیرانێ زەلام تووشی بێ رێزی و سفكاتیێ بووینە).
بورهان عەلی ئەو چەندە ژی دیار كر كو مەزاختیێن زۆر و پێدڤیێن ژیانێ بارێ زەلامان گران كریە زەلام نەشێت كریا خانی و كریا قوتابخانێ و كریا ئنترنێتێ و كریا كارەبێ و هەموو وان كریا دابین بكەت هەڤژین و زارۆك ژی رەوشا نوكە لبەر چاڤ ناگرن و سەرەدەریەكا نە هەژی ل گەل زەلامی دكەن و توندۆتیژی هەمبەری زەلامان دهێتە كرن و گۆت: (هەتا زەلام دهێنە دەرخستن و لۆمەیا وانژی دهێتە كرن، مخابن ژبەر ڤێ قەیرانێ زەلام لمال دهێنە دەرخستن و زۆرجاران ژی زەلام یێ نەچارە مالا خوە بهێلیت و بچیتە دەرڤە، چونكی دەمێ زەلام ڤەدگەڕیتە مال ژلایێ هەڤژینێن وانڤە پت پتەكا زۆر ل سەر سەرێ زەلامی دهێتە كرن و زەلام نەچارە ژمال دەركەڤیت داكو ئاریشە مەزنتر نەبیت).
سەرۆكێ ئێكەتیا زەلامێن كوردستانێ گۆتژی: (مخابن تنێ شەش هەیڤێن ئێكێ یێن ئەڤ سالە 536 سكالا هاتینە تۆمار كرن ژلایێ زەلامانڤە و توندۆتیژی هەمبەری وان هاتیە كرن، هەر ئەڤ سالە ددەمێ شەش هەیڤان دا 39 زەلامان دووماهی ب ژیانا خوە ئینایە و پێنج زەلامێن دیژی هاتینە كوشتن ژلایێ هەڤژینێن وانڤە، ئامارێن ئەڤ سالە زۆر بلندترن ژ ئامارێن سالا بۆری یێن توندۆتیژیێ هەمبەری زەلامان ئەگەرێ سەرەكی ژی ئەو قەیرانا ئابوریە یا نوكە ئەم تێدا).
