چو قوتابخانەیێن بانێن وان ئاخ ل سنوورێ ئاكرێ نەماینە
رەمەزان زەكەریا
ل سنوورێ پەروەردەیا دەڤەرداریا ئاكرێ سالانە چەندین قوتابخانە دهێنە ئاڤاكرن و نووژەنكرن، هەتا نوكە هژمارەكا قوتابخانەیا هەبوو بانێن وان ئاخ بوون، بەلێ ئەڤ سالە ئەو ژی هاتینە گۆهرین و نوكە چو قوتابخانەیەكا بان ئاخ نەمایە و سێ دەوامی ژی ل چو قوتابخانەكا سنوورێ پەروەردا ئاكرێ ناهێتە كرن.
سابر عەلی، پەیڤدارێ پەروەردا ئاكرێ بۆ ئەڤرۆ گۆت: ب سنوورێ پەروەردا ئاكرێ گەلەك یێ بەرفرەهە هەر سێ ناوچەداریێن گردەسێن و بجیل و دینارتە ب خۆ ڤەدگریت و سالانە هژمارەكا قوتابخانا دهێنە نووژەنكرن و ئاڤاكرن سالانە رێژا قوتابیان زێدە دەبیت، لەورا بەردەوام قوتابخانە پێدڤینە بهێنە نووژەنكرن و بەرفرەهكرن و ئاڤاكرن.
ناڤبری گۆتژی: بۆ وەرزێ نویێ 2022 و 2023 چو قوتابخانەیەكا سنوورێ پەروەردەیا ئاكرێ سێ دەوامی تێدا ناهێتە كرن سەرەرای رێژا زۆرا قوتابیان ل دەڤەرێ هەموو قوتابخانا دوو دەوامیە سپێدێ و ئێڤاری.
ناڤهاتی ئاشكراكر: ئەڤ سالە ل سنوورێ پەروەردا ئاكرێ پێنج قوتابخانە هاتینە نووژەنكرن شەش قوتابخانە د وارێ بجهئینانێ دانە چار قوتابخانە ژی بانێن وان ئاخ بوون ژلایێ دەزگەهێ خێرخوازیێ بارزانی ڤەهاتینە دروستكرن و نوكە چو قوتابخانەكا بان ئاخ نەمایە ل دەڤەرێ.
گۆتژی: ئەو قوتابخانێن رێژا قوتابیان زۆرو ئاڤاهی د بچووك بن ل دووڤ بەرنامەیەكێ كو هاتینە دانان دێ هێنە بەرفرەهكرن ئێك ژ وان قوتابخانا ئامادەیا گوندێ هەرنێ یە بریارە سێ ژوور بۆ بهێنە ئاڤاكرن چەند رێكارەكێن كێم ماین ل وەزارەتا پەروەردێ و داریی كو سێ پۆلێن خواندنێ بۆ بهێنە ئاڤاكرن.
پەیڤدارێ پەروەردا ئاكرێ گۆت: پەروەردا ئاكرێ 1800 مامۆستایێن هەمیشەیی و 2600 مامۆستایێن وانەبێژ هەنە دگەل پتر ژ 63 هزار قوتابیان.
